Faka’ikai’i ‘e he Palēmia na’e ‘ikai kene foaki ‘a Polata’ane ki Pilitānia: Ko e toe loi nai mo ‘eni? Featured
Palēmia 'Akilisi Pohiva mo e Talafekau Lahi faka'osi ‘a Pilitānia ki Tonga HE Mr Paul Nessling 'i Lonitoni
9 Mē, 2018. Kuo faka’ikai’i fefeka ‘e he Palēmia na’e ‘ikai kene foaki ‘a Poalata’ane ki Pilitānia lolotonga ‘ene folau atu ki he fakataha ‘a e kau taki ‘o e Kominiueli na’e fakahoko atu ki Lonitoni.
Na’e paaki atu ‘e he ongoongo ni ‘i he ‘aho 19 ‘o ‘Epeleli 2018 ‘a hono foaki ko‘eni ‘e he Palēmia ‘a Polata’ane ki he Minisitā Ki Muli ‘a Pilitānia lolotonga ‘a e fakataha ‘a e Kau Minisitā ki Muli ‘o e ngaahi fonua memipa ‘o e Kominiueli ‘a ia na’e lele fakataha mo e fakataha ‘a e kau taki ‘o e Kominiueli na’e lolotonga fakahoko ‘i Lonitoni.
Na’e tukumai foki ‘a e ongoongo ko’eni ‘i he Letiō Tonga ‘a ia ‘oku pule’i ‘ehe Pule’anga pea toe ‘omai foki ‘e he ngaahi kautaha ongoongo muli foki.
‘Ikai ngata ai na’e toe tuku mai ‘a e ongoongi tukuatu ‘a e kau folau na’e muimui ‘i he Palēmia ki he fakataha koeni pea na’e hā mahino pe ai hono foaki ko’eni ‘a Polata’ane.
Kaikehe kuo kole fakamolemole a e Palēmia ‘Akilisi Pohiva mo pehe na’a kuo hala ‘a hono faka’uhinga’i ‘ene lea na’e fai ka ko’ene mahino ki he tokotaha lau mo fanongo ongoongo kotoa na’e foaki ‘e he Palēmia ‘a Polata’ane ke ngāue’aki ‘e Pilitānia kapau tenau toe foki mai ‘o toe fokotu’u ha ‘ofisi ‘i Tonga ni.
Ko Polata’ane foki na’e lisi pea ngāue’aki ‘e he ‘Ofisi Haikomisiona Pilitānia pea koe lisi koia na’e ‘osi mo kakato pe ia ‘i he ta’u 2001 pea foki leva ia ki he Fale ‘o e Tu’i.
‘Oku mole ke mama’o hano taketi’i ‘o e Palēmia ka ‘oku fu’u fiema’u ke fakamaa'ala'ala 'a e kaveinga pea tala ki he kakai ‘a e mo’oni pea ke ‘oua ‘e veiveiua ‘enau ma’u ki he ngaahi me’a ‘oku totonu kenau ‘ilo kiai fekau’aki m oe kau taki pehe ki he fonua.
