Laka he $500,000 mo’ua Tu’i Uata mo e Kautaha Uata ki he Poate Taulanga Featured
1 Mē, 2018. ‘Oku laka he pa’anga ‘e $500,000 (Nima Kilu) ‘a e mo’ua ‘o e Minisitā Leipa Tu’i Uata mo e Kautaha Vaka Uata ki he Poate Taulanga ‘a Tonga.
Ko e mo’ua ko’eni ‘oku lauita’u ‘a hono ‘ikai ke totongi pea ‘oku a’u mai ki he ‘aho ni kuo a’u ki he tu’unga kuo totonu mo taau ke ngaue atu leva kiai ‘a e lao pea ke fakafefeka foki.
Ko e mo’ua foki ‘eni ki hono ngāue’aki ‘o e uafu ‘o kau ai mo e ngaahi totongi kehe fakatatau ki he lao mo e tu’utu’uni ngāue ki hono ngāue ‘aki ‘o e taulanga.
‘I he fakamatala ‘oku ma’u ‘e he ongoongo ni kuo launga ‘a e kau ma’u vaka tokolahi ‘a ia ‘oku nau tauhi ki he lao mo e ngaahi tu’utu’uni ‘a e Poate pea nau totongi mo e ngaahi totongi ‘oku fiema’u ‘e he lao mo e tu’utu’uni ngāue ‘i hono kei tukuange ‘a e kautaha ko’eni kenau fa’ifa’iteliha lolotonga ia ‘oku ‘ikai kenau muimui ki he lao ‘o e fonua.
Ko e konga lahi ‘o e Uafu Faua ‘oku ngāue’aki ‘e he ngaahi vaka ‘a e kautaha ko’eni pea kuo ngoto mo e taha ‘o e ngahai vaka ‘i he loto uafu ‘a ia ‘oku hoha’a lahi ki heni ‘a e Poate Taulanga tukukehe ange ‘a e uesia ki he ‘atakai mo e tu'unga ta'efe'unga 'oku 'i ai 'a e ngaahi vaka ni.
Kuo ma’u ‘e he ongoongo ni ‘a e fakamatala falala’anga mo’oni na’e a’u tonu ‘a e Sea ‘o e Poate Taulanga Steve Edwards pehe ki he CEO Mosese Lavemai ki he Palēmia ke fakahoko ha’a ne tu’utu’uni mo kole ke tokoni fekau’aki mo e mo’ua ko’eni makatu’unga ‘i he faingata’a’ia ‘a e Poate koe kau ‘a Tu’i Uata ki he Kapineti.
‘I he fakamatala kuo ma’u ‘e he ongoongo ni na’e tu’utu’uni ‘e he Palēmia ‘Akilisi Pohiva ke ngāue atu ‘a e Poate ke fakamavahe’i ‘a e ngaahi vaka ‘o e kautaha ni pea ke fakahoko ‘a e tu’utu’uni ‘a e lao.
Kapau koe tu’utu’uni ‘eni ‘a e Palēmia pea ‘oku fakapotopoto ‘eni ke fakahoko tukukehe kapau ‘e toe tukufakatafa’aki pe ‘a e lao 'o hange koia kuo toutou hoko ki mu’a.
‘Oku fehu’ia lahi he ngaahi ‘aho ni ‘a e kakai ‘oku nau kalanga ke tau’i e faitotonu mo ‘ofa ki he masiva ‘o hange ko Tu’i Uata pea hili koia pea totongi mo’ua 'a e kakai masiva ia kae fa’ifa’iteliha pe ia mo maumau lao.
‘I he taimi tatau ‘oku hala pea ‘ikai totonu ‘i he tafa’aki kotoa ke fili ha kakai kenau hoko koe kau taki pea nau tu’u mai ke fakafofonga’i ‘a e Pule’anga mo taki lolotonga ia ‘oku nau mo’ua lalahi ki he Pule’anga mo maumau’i ‘a e lao ‘o e fonua.
‘Oku fu’u fakalilifu ke hoko ‘eni ‘i ha kuonga ‘oku taku koe kuonga ‘o e temokalati mo e Pule'anga 'o e kakai.
