Fūfū’i ‘e he Palēmia mo e Minisitā Tukuhau mo’ua lau miliona Tokoni Palēmia Semisi Sika ‘i he Tukuhau ^Featured

‘Oku mahino mai foki ko e mo’ua tukuhau ‘o Semisi Sika ‘oku laka hake ia ‘i he pa’anga ‘e 1 miliona ‘a ia ‘oku fika’i fakatatau foki ‘eni ki he‘ene pa’anga hū mai mei he’ene pisinisi cater ‘i he Ako Ma’olunga Liahona ‘a ia ‘oku laka hake he pa’anga ‘e taha miliona ‘oku ne ma’u mei ai ‘i he ta’u.

‘I he fakamatala ‘oku ma’u ‘e he ongoongo ni na’e ngāue atu ‘a e Potungāue ni ‘i hono kei tataki ‘e he CEO kuo malōlō ke fakahoko ha ngāue fakalao ki he mo’ua ko’eni ‘o Semisi Sika ka na’e ‘ikai ke poupou kiai ‘a e Palēmia pea ta’ota’o atu kiai hono nima to’omata’u ‘a ia ko hono foha ia ‘i he fono pea ‘oku Minisitā ‘i he Potungāue ko’eni ‘i he ‘aho ni ke ki’i tukufakatafa’aki ‘eni ‘o hange pe koe founga anga maheni ‘oku lele mai ‘aki ko hono tukufakatafa’aki ‘a e lao.

‘Oku malie he ko e fakamatala ‘oku ma’u na’e fakahoko pe ‘a e ngāue tatau ki he mo’ua ‘o Semisi Sika ‘o hange pe ko hono faka’ilo ‘o e Tongasat ka koe me’a pango he na’e ‘omai ‘a e tu’utu’uni ia mei taumu’a ke tuku atu pe ‘a e Tongasat ki he Fakamaau’anga kae tukuange pe ‘a Sika ia he koe Minisitā lolotonga.

Kuo hao ‘a e Tongasat ia ‘i he fakatonutonu ko’eni pea na’e mahino pe foki ‘a e ‘uhinga mo e founga na’e ‘ave ‘aki ‘a e Tongsat ki he Fakamaauanga neongo na’e ‘osi tukuange pe ia ‘e he Fakamaau’anga ‘a e Potungaue Tukuhau ki he Tukuhau (Tax Tribunal) ‘a e Tongasat kae kei ‘ave pe ‘o ‘iku totongi mo’ua ai ‘a e Pule’anga he ‘aho ni.

Kaikehe, ‘oku mahino foki ‘oku ngā’uta ‘a e fonua ‘i hono ‘ohake ‘o e kaveinga ni pea ‘oku fakahoko ‘a e ngāue mei he ngaahi tapa kehekehe ‘o e fonua ke kumi ki he fakamaau totonu pea tau’i mo e faihala ‘a ia koe taumu’a foki ia na’e tu’uaki ‘e he Pule’anga ‘o e ‘aho ni ka kuo nau tafoki tikili ‘e 360 ‘o fa’ofua ‘i he fehangahangai ‘o ‘enau taumu’a.

Kuo tukuange mai foki ‘a e kaveinga ia ko’eni ‘i he ngaahi mitia faka-sosiale pea na’e ‘ohake pe foki mo e fifili ‘i he faitu’utu’uni ‘a e Palēmia mo ‘ene fili mo fakahifo ‘e ne kau Minisitā he ko Semisi Sika na’e ‘i ai ‘a e tu’utu’uni fekau’aki mo ia ‘a e Fakamaau’anga Lahi ‘i he ta’u 2016 fekau’aki mo hono ngāuehala ‘aki ‘a e Pa’anga ‘a e Kautaha Liiki ‘a Tonga (TNRL) lolotonga ‘oku ‘i he lakanga Sea ‘o e Kautaha ni.

‘Oku toe mahino pe foki koe fakatonutonu ia ‘i he Kautaha Liiiki a Tonga ‘oku kei hokohoko atu pe ia pea ‘oku ne ‘omai ‘e ia ‘a e ‘ata ‘oku ‘ikai lelei fekau’aki mo e tu’unga falala’anga ‘o ‘etau Tokoni Palēmia.

‘Oku toe ‘i ai foki mo e fifili ‘i hono tukuange mai ko’eni ‘a e mo’ua ‘o Semisi Sika ‘i he Tukuhau mo e lahi ‘o e mo’ua mo ‘ene pa’anga hū mai ‘a ia ‘oku ne ‘omai ai ‘a e ngaahi fehu’i ko’eni ke fai ha vakai kiai:

1. Ko Semisi Sika nai ‘oku ne fakapa’anga ‘a e konga lahi ‘a e ngaahi ngāue ‘a e PTOA?

2. Ko Semisi Sika nai na’a ne totongi ‘a e ngaahi mo’ua Fakamaau’anga ‘o e kau memipa ‘o e PTOA kae ‘atā kenau kau atu ki he fili Fale Alea?

3. Ko e ‘uhinga nai hono fili ia ke Tokoni Palēmia neongo ‘oku ‘ikai ha’ane fu’u taukei fēfē ko’ene tokoni fakapa’anga ki he Taki mo e kau Memipa?

4. Ko e toe ‘uhinga nai ‘eni ‘a e ‘ikai ke fai ha ngāue kiai ‘a e taki fekau’aki mo e tu’utu’uni ‘a e Fakamaauanga ‘i he ta’u 2016 fekau’aki Semisi Sika mo e Kautaha Liiki ‘a Tonga?

Ko e konga pe ‘ena ‘o e ngaahi fehu’i ‘oku tuku atu ‘o makatu’unga ‘i hono lave’i ‘o e kaveinga ni ‘a ia ‘oku mafatukituki pea ‘oku totonu ke ‘oua ‘e tukiunoa’i he ‘oku fekau’aki tonu ‘eni mo e kau ma’u tu’unga ‘a ia ‘oku nau tataki ‘a e fonua.

‘Oku muimui’i ofi ‘e he ongoongo ni ‘a e kaveinga ni mo ‘ene tu’u ki he kaha’u.