Nofo hotele a koe Palemia ka mau ‘ela atu kimautolu he ano ^Featured

3 Ma'asi, 2018

Tangata’eiki,

‘Oku ou kole keu fakaa’u atu mu’a ‘eku tohi ko’eni ke fakaha atu ‘eku fifili mo ‘eku ta’efiemalie ‘i he me’a homau fakafofonga pea koe Palemia ia ‘o e fonua ‘oku fakahoko kiate kimautolu.

Kimu’a ‘i he to ‘a e afaa mo e hili ‘a e afaa na’e hiki ia ‘o nofo hotele pea faka’eke’eke mai ‘e he ngaahi mitia pea ne pehe koe ‘uhinga ‘ene hiki ki he hotele he ‘oku ano honau ‘api.

Na’e ‘osi langa ‘e he Pule’anga ‘a e ‘api ke me’a ‘o nofo ai pea ‘ikai me’a ia ai pea to mai ‘a e afaa ia pea hiki ia ‘o nofo hotele.

Ko e konga lahi ‘o vahenga Kolomotu’a ‘oku nofo ‘i he ano pea ‘oku mau fe’ao mo e namu kae lolotonga ‘emau faingata’a’ia kuo me’a ia ‘o nofo hotele.

‘Amusia e Palemia ia ‘oku nofo hotele ia kamau ‘ela atu kimautolu he ano mo e namu pea kapau koe taki lelei ia ma’a e kakai pea me’a mai ke mau mamahi fakataha mo ongo’i fakataha pea ka ‘ikai pea ne totongi ‘a e kau toulekeleka ‘oku mau fokotua he ano kenau lave atu he monu mo e masani ‘oku ne ma’u ‘i he taimi faingata’a ni.

‘Oku ou tui ‘Etita kuo fe’unga hono talaki ko e Palemia ‘a e kakai he ‘oku hoko ‘a e faingata’a pea me’a ia ‘o nofo hotele kamau ‘ela atu pe mo e kainga ‘o kunima pe mo tali vai ki langi mei he loto ano ‘o e vahenga Kolomotu’a.

‘Ofa pe ‘e ongo atu ‘a e tangi mo e to’e ni pea ke fanongo mai kiai homau fakafofonga.

Faka’apa’apa Atu,

‘Eliesa Fifita
Tufuenga
Kolomotu’a