Palēmia mo e Kapineti ‘oku totonu ke takimu’a ka 'oku 'ikai koe toi mei mui ^Featured

‘Oku kau ‘eni ia he tali fakavalevale tapu ange mo e Palēmia pea ‘ikai ngata ai ‘oku mafola atu ki he ngaahi fonua mo e Pasifiki mo mamani ‘a e mata vaivai ‘oku ‘i ai ‘a e fa’unga taki ‘i he fonua pehe ki he fanofano ‘a e ma’u mafai (deny responsibility) mei he fatongia mafatukituki ko’eni.

Ko e Palēmia mo e Kapineti ‘oku totonu kenau taaimu’a he me’a kotoa pea kenau tu’u mai ‘o fakahoko ‘a e ngaahi tu’utu’uni faka-taki ka e ongo’i ‘e he fonua mo e kakai ‘oku nau malu pea tokangaekina kinautolu.

Kuo talaki foki ‘a e Lao Fakatu’upakē (Emergency) pea koe taimi ‘oku talaki ai ‘eni ‘i ha fa’ahinga fakatamaki ‘i ha fonua kuo pau ke nofo taha ‘a e mafai mo e faka’uto’uta ‘i he Palēmia mo e Kapineti pea kenau faitu’utu’uni (delegate) ‘a e mafai ki he ngaahi kupu ki lalo.

Ko e taimi ‘oku tō ai ha matangi ‘i he folau tahi pea ‘oku ‘ikai toe mohe ‘a e Kapiteni pehe ki he’ene kau ‘ofisa ma’olunga ka ‘oku nau ‘a’a kae ‘oua kuo matafi ‘a e fakaevaha koia.

Kapau ‘oku te’eki ke sai lelei ‘a e tengetange ‘o e Palēmia pea ‘oku ‘i ai ‘a e Tokoni Palēmia mo e kau Minisitā ka ‘oku ‘ikai ko hono tukuatu ‘a e fa’ahinga tali ‘oku ho’ata mei ai ‘a e tō nounou faka-taki mo e ‘ikai ke ‘ilo ‘a e me’a ke fakahoko.

‘Oku totonu foki ke ‘i ai ha komiti ngāue ‘a e Kapineti kenau muimui’i ‘a e ngaahi nga’unu kotoa fekau’aki mo e fakaakeake pea ko e Palēmia mo e Kapineti tenau faka’uto’uta ‘i hono tauhi ‘o e fetu’utaki mo e ngaahi Pule’anga muli ‘oku tokoni mai pehe ki he ngaahi kautaha tokoni fakavaha’a pule’anga pea ke ‘oatu ‘a e fiema’u ‘a e fonua ‘i he lēvolo koia pea fakahoko leva ia 'i he vave taha mo e taimi totonu.

Kaikehe kuo mahino mai foki mei he tali ‘a e Palēmia na’e ‘ikai ke fakahoko ‘eni pea ‘e ‘i ai ‘ene uesia ki he fonua he ‘oku ‘i ai ‘a e tui na’e toe mei lahi ange ‘a e tokoni ‘e mahua mai ki he fonua kapau na’e laini mu’a ‘a e Palēmia mo e Kapineti pea ko honau fatongia totonu ia.

Kuo mahino mai foki kuo ‘i ai ‘a e ngaahi kautaha tokoni kuo nau tau hangatonu ke fakahoko ‘a ‘enau tokoni koe fuoloa ‘a ‘enau fakatatali kiha faka’ilonga mei he Pule’anga.

‘Oku fakamālō’ia ‘a e ngāue ‘oku fakahoko ‘e he NEMO pehe ki he ngaahi kupu fekau’aki pea ‘oku ‘i ai pe ‘enau tu’utu’uni ngaue moe laini ‘oku lele ai ka ‘oku fiema’u lahi ‘a e ngaahi tu’utu’uni (directions) mei he Palēmia mo e Kapineti he ‘e tokoni lahi foki pea koe taimi ‘eni ‘a e tu’u fakataha.

‘Oku totonu mo taau ke ‘ohake ‘a e kaveinga ko’eni ‘a ia na’e me’a hangatonu ‘aki ‘e he Palēmia ki he Letiō Nu’usila pea fakamafola ‘i mamani he ‘oku fehu’ia ‘a e me’a ko’eni ‘a e Palēmia mo ‘ene fanofano me he fatongia fakataki pehe ki he’ene Kapineti.

‘Oku ne ‘oatu foki ‘a e ‘ata faikehe ‘o e fonua ki tu’apule’anga pea ‘oku fehu’ia ai foki mo e founga ‘oku fakalele ‘aki ‘a e fonua.