Tokoni 'a e Pule'anga ki hono monomono 'a e ngaahi faleako Featured
11 Me, 2018. ‘E fakahoko ‘e he Pangikē ‘a Mamani (World Bank) ha tokoni fakapa’anga ki he konga hono ua ‘o e ngaahi ngāue langa koe’uhi ko e ngaahi maumau na’e hoko tupu mei he Afaa ko Gita.
‘E toki ma’u mai ‘a e tokoni ko ia ‘i he konga kimui ‘o e ta’u ni pea ‘i he’ene pehē kuo fakahoko ‘e he Kapineti ‘a e ngaahi tu’utu’uni ko ‘eni –
1. Ke tokoni ‘a e Pule’anga ki hono totongi ‘a e konga ‘o e mahu’inga ‘o e ngaahi naunau ki he monomono ‘o e ngaahi fale ako na’e maumau’i ‘e he Afa ko Gita;
2. Ke faka’ataa ‘a e totongi tute ‘o e ngaahi naunau kotoa ‘e ngāue’aki ki he monomono;
3. Ke tokoni ‘a e Pule’anga ki hono ‘oatu ha mataotao ke ne tokanga’i ‘a e ngaahi ngāue ki he monomono, ke fakapapau’i ‘oku fakahoko totonu ‘o fakatatau ki he tu’utu’uni ‘a e lao ki he langa (Building Code).
Ko e ngaahi monomono ki he ngaahi ‘apiako ‘a e Pule’angá ‘oku lolotonga fakahoko e ngāue ki ai pea ‘e toki ‘oatu ‘a e fakamatala fekau’aki mo ia ‘amuiange.
