Fiema’u ke ta’ofi fakapolitikale’i ngaahi ngāue ‘a e fonua katau makape ^Featured

Kuo a’u ‘eni kiha tu’unga ‘oku fu’u ‘ilonga pea mahino ‘a hono fakapolitikale’i ‘a e meimei katoa ‘a e ngaahi ngāue ‘a e Pule’anga mo e fonua pea ko hono ‘ai mahino ‘oku ‘ikai ke tokoni ‘eni ki he kakai mo e fonua fakalukufua.

Ko e ngaahi faka’ilonga fekau’aki mo hono fakapolitikale’i ‘a e ngaahi ngāue ‘a e fonua kuo lahi fau hono ngaahi fakamo’oni ‘o kamata pe mei he filifilimanako hono fili ‘o e ngaahi lakanga ngāue ‘i he Pule’anga mo ‘ene ngaahi poate ki hono maumau’i ‘a e ngaahi tu’utu’uni ngāue ‘a e Pule’anga a’u atu ai pe ki hono maumau’i ‘o e Lao mo e Konisitūtone.

‘Oku afuhia ‘a e ngaahi pou tuliki kotoa ‘i he fonua ‘i he nga’unu ko’eni pea ‘oku a’u ki he nofo ‘a e ngaahi kolo, ha’a, fāmili, sipoti pea a’u foki ki he lotu mo e siasi.

‘Oku ‘ikai koha taimi ‘eni ia ke fai ai ha fetuhu ‘aki holo pea 'oku mole ke mama'o ha toe 'uhinga ange he kuo lahi ‘a e maumau ia ‘i he fonua pea koe taimi totonu ‘eni ‘oku fiema’u ai ke fanongo ai ‘a e kau taki ki he le’o ‘o e kakai mo e kau fakaanga he koe temokalati ia ‘oku pehe.

‘I he taimi tatau ‘oku totonu ke manatu’i ‘e he kau taki faka-politikale ‘e ‘ikai ha taki faka-politikale pe koha fa’ahi faka-politikale ‘e pule ‘o a’u ki he ngata’anga ‘o mamani he ‘oku feliuliuaki ka ‘oku kei mahu’inga ke pukepuke ‘a e ma’uma’uluta, tukufakaholo mo e malu ‘a e fonua ‘a ia ‘oku kei Tonga ai ‘a Tonga 'i he 'aho ni.

Ko e maumau lahi taha ia ‘oku hoko ‘i he ‘aho ni koe ‘ikai ke tukuange ‘a e ngaahi ngāue ‘a e Pule’anga mo e fonua ke lele tau’atāina ‘o mavahe mei he fakaukau kuo pau kete poupou ki he Palēmia mo e PTOA pe koe Tu’i mo e Hou’eiki pe ko kinautolu ‘oku nau fakaanga mai ki he Pule’anga.

‘Oku ‘i ai ‘a e faka’amu ke mahino ki he Tonga kotoa ‘a e mahu’inga ketau faka’apa’apa mo poupou pe ki he me’a ‘oku totonu mo fou ‘i he founga ‘oku fakalao pea ‘ikai ke ha’iha’i ki ha fa’ahinga tui faka-politikale.

Ko e palopalema vivili ia ‘e taha ‘i he ngaahi ‘aho ni koe kakai ‘oku nau ‘ilo pe ‘a e me’a ‘oku hala mo totonu ka nau kei poupou pe ki he faihala mo e ngaahi ngaue ‘oku maumau ai ‘a e lao pea koe me’a pango he ‘oku ta’e ‘amanekina ‘a e kau heni ‘a e kakai ma’u tu’unga mo e kakai ‘oku taku ‘oku nau maama pea lotu mo ako lelei.

‘Oku hoko foki ‘i hono faka-politikale’i ‘a e ngaahi ngāue ‘a e fonua ‘a e ‘asi mai ki mu’a ‘a e kakai ‘oku ‘ikai ke ‘ilo pe pe ko ‘enau hu’u mei fe pea ‘oku ‘i ai ‘a e faka’apa’apa lahi heni katau ngaue ‘aki pe ha lea mahino.

Ko e ni’i ko’eni ‘oku nau fakahoko ‘a e maumau lahi mo’oni pea ‘oku nau poupou lahi ki hono fa’ufa’u ‘a e ‘atakai ke kene fakatupulekina hono faka-politikale’i ‘a e ngaahi ngāue ‘a e fonua he ‘oku nau kau ai he lau pea lau ai honau taumu’a pea hiliō ai ‘a e ma’u enau tu'umalie fakafo'ituitui mo e koloa mei ai.

Ko hono maumau pe ko eni’ihi ko’eni hange koe fakahua ‘a e kau kava Tonga ‘oku nau hala he fika mo e laukonga pea na’e ‘ikai kenau faingamalie ke ako, ‘i ai honau hisitōlia faihia pea ‘oku ‘ikai kenau malava ke sio ki he ola ‘o ngaahi ngāue pango ‘oku nau fakahoko.

‘Oku ‘ikai ke faka-natula ke fale’i ‘a e kau taki ‘o e fonua ‘e ha kakai pehe ni he ‘oku ‘osi talanoa mahino pe kiai ‘a e hisitōlia ki hono iku’anga.

Ko e poini mahu’inga ia heni koe fiema’u ke ta’ofi leva hono faka-politikale’I ‘a e ngaahi ngāue ‘a e fonua he ‘oku ne holoki ‘a e me’a kotoa pe pea ‘oku hoko ai ‘a e moveuveu langa ai mo 'a vahevahe pea fua leva ‘e kitautolu kakai  ‘o e fonua ‘a hono kanongatāmaki.

‘Oku ‘ikai ke langa ha fonua ‘aki hono faka-politikale’i ‘ene ngaahi ngāue pea koe langa fonua mo e vīsone kiha kaha’u ‘e tu’uloa moha ‘ikonomika ‘oku mo’ui pea tokoni ki he kakai ‘oku fakahoko ‘i he laumalie tau’atāina mo e muimui ki he lao mo e totonu pea pule 'a e ola 'e lelei ki he fonua mo e kakai ka 'oku 'ikai koha lelei kiha ni'ihi tokosi'i pe koha fa'ahi fakapolitikale.