“ Malo 'aupito Nepituno hono toutou 'omai 'a e ngaahi faiva ta'anga mo e faiva hiva malie he kolomu 'Aati mo e Litilesa 'a ia 'oku mahu'inga mo 'aonga lahi ke kau ko e lesoni makehe he silapa ako 'a Tonga fakataha mo e 'aati mo e litilesa faka-'Ingilisi (mo e ngaahi fonua kehe). 'Oku malie 'a e hingoa 'o e ta'anga hiva ni ko e "Haka He Langi Kuo Tau" 'a ia 'oku lahi hoko fakataha mo e lea ko e "Pata he La Kuo Tu'u" 'o ngaue'aki ko e ongo lea heliaki mo e paloveape tu'utauhoa he tufunga lea, faiva lea, faiva ta'anga, faiva maau, faiva lotu mo e faiva malanga. 'Oku 'uhinga 'a e "haka" pe "hakahaka" ko e fiefia ('a ia ko e lea mei 'uta he faiva) mo e "pata" pe "patapata" ko e vekeveke mo e polepole ('a ia ko e lea mei tahi he faiva faifolau mo e tufunga fo'uvaka). 'Oku to e fa'a 'asi he kolomu Fonua mo e Tala 'a Hufanga 'a e "tauelangi" ('a ia 'oku tatau mo e "langi kuo tau") ko e tumutumu ia 'a e ongo fakahevani mo fakalaumalie ko e "mafana" mo e "vela" 'oku ma'u ha faiva 'oku tatau, potupotutatau mo malie pe faka'ofo'ofa hono anga. ”