“ Tapu moe matanga pea tulou moe ha'ofanga kae fai ha fakahoha'a moha huhumama koe toe tanakia kihe kaveinga 'oku fai hono talanga mo taulama. 'Oku 'ikai ngata pe he fekau'aki 'ae "kula" moe "'uli" moe "ta" moe "va" he 'ata-ki-loto moe "fuo" moe "uho" he 'ata-ki-tu'a ka 'oku toe fetu'utaki moe la'a he 'aho moe mahina he po, mo'ui moe mate moe ha fua
'Oku ngali koe 'uhinga ia hono ngaue'aki 'ae "lau po" (po taha / potaha, po ua / poua moe ha fua) he "mate" kae ngauekai 'ae "lau 'aho" he "mo'ui" (fai'aho moe ha fua). 'Oku fekau'aki 'ae "mate" moe "teunga 'uli" -- 'aia 'oku ne "folo" kotoa ki loto 'ae ngaahi lanu 'e fitu moe mo'ui moe "teunga hina" -- 'aia koe lanu (kulo)kula -- 'o ne "puaki" kotoa ki tu'a 'ae 'u lanu 'e fitu.
'Oku ngali koe 'uhinga ia 'ae lea koe: "koto kula noa," "fakala'a 'i siatamaki" ("fakala'a 'i siamelie") moe "fakala'a 'i tahitamaki" ("fakala'a 'i tahimelie") moe "fohe'uli" (rudder) 'oe vaka moe kalia koe lahi ke fai 'ae faiva faifolau he po('uli), 'aia 'oku 'asi lelei ai 'ae maama (kula; hina) 'oe 'otu kaveinga he langi (fakataha moe tafe 'ae peau moe angi 'ae matangi).
'Oku mahino lelei 'eni hono ngaue'aki 'ae kafa kula / kafakula moe kafa 'uli / kafa'uli he tufunga lalava, kele kula / kelekula moe vali 'uli / vali'uli he tufunga ngaohikulo, kili kula / kilikula moe vaitohi 'uli / vaitohi'uli he tufunga tatau, koka kula / kokakula moe tongo 'uli / tongo'uli he nimamea'a koka'anga, fe'unu kula / fe'unukula moe fe'unu 'uli / fe'unu'uli he nimamea'a lalanga moe ha fua.
'Oku hoko leva 'ae (kulo)kula moe ('uli)'uli koe lanu fakafonua 'a Tonga kae hoko 'ae (kulo)kula moe (hine)hina koe lanu fakalotu 'ae Kalisitiane (moe lanu fakaako 'ae Kolisi Tonga) -- pea koe kula koe hina pe ia moe hina koe kula pe ia -- 'aia koe kula koe heliaki / taipe 'oe ta'ata'a / toto 'o Kalaisi moe hina koe heliaki / taipe kihe ma'a moe kinokinoifia hono ta'ata'a / toto).
ANFF leva e malanga kae tau,
'Ofa ma'u moe na'una'u fau,
Hufanga
Professor of Art, Culture & Critical Anthropology
MUT & VACIAR ”