Ke totongi ‘e Pohiva Tui’onetoa mo e kau Faka’iloa $112,000 tupu ki he Talatalaaki Featured
20 Sune, 2018. Kuo tu’utu’uni aofangatuku e he Fakamaau’anga ‘i he uike kuo ‘osi ke totongi ‘e he kau Faka'iloa Pohiva Tui’onetoa, Faifekau Kava Fa’oliu, Faifekau Sione Havili Maile mo e Feohi’anga Mo’ui Fo'ou ‘a e pa’anga ‘e taha kilu tahamano uaafe tupu ($112,000 tupu) ki he Tafa’aki ‘a e Siasi Tokaikolo ko e fakamole ki he hopo na’e fakahoko.
Na'e teuteu foki ‘e he tafa’aki ‘a e Talatalaaki ‘a ia na’e fakafofonga’i ‘e he'enau loea William Clive Edwards ‘a e tohi mo’ua ki he ngaahi fakamole ki he fakatonutonu na’e fakahoko pea neongo na’e fakafepaki kiai ‘a e tafa’aki ‘a e kau Faka’iloa fakafou mai 'i heenau loea Laki Niu ka na’e tali ‘e he Fakamaau’anga ke totongi ‘a e mo’ua ko’eni.
Na’e fakahoko foki ‘a e ‘eke ‘a e Siasi Tokaikolo ‘Ia Kalaisi ‘i he ta’u 2017 ke fakafoki ange ‘enau koloa ‘a ia na’e puke ‘eni ‘e kinautolu na’e mavahe mei he Siasi Tokaikolo 'Ia Kalaisi ‘o fokotu’u ‘a e Feohi'anga Mo’ui Fo’ou pea na’a nau taukave’i koe koloa 'oku 'anautolu pe ia pea 'ikai ha kaunga kiai 'a e Siasi Tokaikolo 'Ia Kalaisi.
Na’e ikuna ‘a e kau Faka’iloa 'o taki mai ai 'a Pohiva Tui’onetoa, Faifekau Kava Fa’oliu, Faifekau Sione Havili Maile mo e Feohi’anga Mo’ui Fo’ou ‘i he Fakamaau’anga Lahi.
Na’e pau ai ke tangi ‘a e Siasi Tokaikolo ki he Fakamaau’anga Tangi pea tu’utu’uni ai ‘i he ‘aho 26 ‘o Ma’asi ‘e he kau Fakamaau Lahi ‘e toko 3 ke fakafoki ‘a e kelekele mo e koloa koe koloa ia ‘a e Siasi Toakikolo ‘Ia Kalaisi.
Ko e koloa ko’eni koe kelekele, falelotu mo e falenofo’anga faifekau ‘a ia na’e tu’utu’uni ‘e he Fakamaau’anga Tangi koe koloa totonu pe ia ‘a e Siasi Tokaikolo ‘Ia Kalasi pea na’e hala ‘a e tu’utu’uni ‘a e Fakamaau’anga Lahi ke foaki ki he kau Faka'iloa mo e Feohi’anga Mo’ui Fo’ou 'a e koloa ko'eni.
Ko hono toki aofangatuku ‘eni ‘a e ngaahi fakamole (costs) ki he hopo ko’eni pea kuo tu’utu’uni ai ‘e he Fakamaau’anga ke totongi 'e he kau Faka’iloa 'a e fakamole ko'eni.
