“ 'Oku fakamahinohino 'e he naunau 'o Winston 'a e ngata'anga 'o e Tangata mo e me'a 'oku lava mapule'i 'e he Tangata pea mo e mahulu atu e Mafi o Sihova. Na'e 'ikai ke puli 'a hono lotua 'o Vava'u pea anga'ofa 'a Sihova 'o 'ave matangi ki he feitu'u kehe, 'a ia 'oku ne kei fanongo mai pe ki he tangi mo e kole 'a e kau angahala.
Koia ai, 'oku ou tui ko e taha eni e ngaahi Fakamaau hotau 'Otua ko hotau fakatonutonu, ko hotau fakalelei'anga pea mo IA (SIHOVA). 'Oku ne heka mai hono mafimafi he afaaa, he te tau ofi ai kiate IA, i he'etau lotu mo e kole, pea koeha ha tukupa tetau fai i he taimi o e faingata'a, ketau fakahoko leva ia i he taimi o e nonga.
Ketau siofi leva kitautolu he taimi ni, pe oku fenapasi etau fakahoko fatongia pea mo e finangalo o Sihova, pe ko hotau lelei taha oku hooifua kiai hotau OTUA pe ko e foi fakatupumala pe oku tau fai. Tau lotu leva ki he Eiki kole fakamaatoato ke ne tataki kitautolu i he hala 'oku finangalo kiai. Te tau tuhu holo, ka 'oku tau kaunga kotoa pe ki he lelei mo e kovi hotau Fonua ni.
'E Sihova 'oua mu'a na'a hiki ho fofonga mei homau Fonua he temau faka'ofa. Valoki'i kimautolu 'aki ho ngaahi mafimafi, ke mau 'ilo ai e ngaue ke fai mo e ngaue ke tuku, ulungaanga 'oku taau mo e Afio na, ulungaanga 'oku fiema'u ke li'aki. Kole fakamolemole atu Sihova keke fakamolemolei ange emau tonounou, ka ke takiekina kimautolu hono kotoa pe mei he Fale 'o e Tu'i ki he si'i hifo 'i he fonua ni, tuku mai kemau 'ilo e me'a 'oku ke hoifua kiai kae lava kemau tolonga 'i ho fonua, pea ke langilangi'ia pe 'a e 'Afio na 'i he ngaue 'oku mau fai. 'I he Huafa ho 'Alo ko Sisu Kalaisi ko homau Fakamo'ui. Emeni. ”