Kamata Puna Vakapuna SAAB 340 'a e Real Tonga Featured
Neiafu, 3 Me 2016. Na’e tu’uta ki he Mala’evakapuna Lupepau’u ‘i he pongipongi ‘aneafi Monite 2 Me 2016 ‘a e fuofua puna ‘a e vapuna SAAB 340 ‘a e kautaha Real Tonga. Ko e vakapuna sea 37 foki ‘eni pea ‘oku hoko ‘eni koe faka’amanaki lelei ki he fepuna’aki fakalotofonua.
Fakatatau ki he fakamatala mei he kautaha Real Tonga ko e vakapuna ko’eni ‘oku sea 37 pea na’e ngaue’aki ‘a e kalasi vakapuna ko’eni ‘e he kautaha Air New Zealand ki he’ene fepuna’aki he tukui motu ‘o Nu’usila. Ko e fakakoloa foki ‘eni ki he Takimamata ‘i he fonua he ‘oku malava ‘e he kalasi vakapuna ko’eni ke fakafolau ha kau pasese tokolahi ange.
Na’e ‘i ai foki ‘a e hoha’a mei he sekitoa Takimamata fekau’aki mo e tu’unga ‘o e fepuna’aki faka-lotofonua ka kuo mahino mai ‘eni ‘o fakatatau ki he fakamatala mei he kautaha Real Tonga ‘oku nau nga’unu pe ki mu’a ke fakakakato ‘a e fiema’u ni.
Na’e lava atu foki ‘a e fakafofonga ‘o e ongoongo ni ‘i he puna fika ua ‘a e vaka ni ‘i he efiafi ai pe ‘aneafi pea na’e mahino ‘a e tu’unga lelei, vave mo ‘ataa foki ‘a e vaka ni ki he fefolau’aki.
