Afea Vakameili Pacific Pearl ‘a Neiafu mo Nuku’alofa tu’unga he Afā ‘a Fisi Featured
Pacific Pearl Visiting Vanuatu
Nuku’alofa, 22 Fepueli 2016. Kuo fakapapau’i mai mei he Potungāue Takimamata ‘a Tonga ‘e afea ‘e he Vakameili koe Pacific Pearl ‘a e Lolo ‘a Halaevalu ‘i he ‘aho 26 ‘o Fepueli pea hoko mai ai pe ki he taulanga Nuku’alofa ‘i he aho 27 ai pe ‘o Fepueli 2016.
Ko e makatu'unga 'a e ‘a’ahi fakatu’upakē mai ko’eni ‘a e Pacific Pearl fakatatau ki he fakamatala ‘a e Kautaha Vaka ‘oku nau fakafofonga’i ‘a e Vakameili ‘i Tonga ni ‘i he fakatamaki fakaenatula na’e ‘omi ki Fisi ‘e he Saikolone faka-talopiki ko Winston.
'Oku hoko foki 'a e maumau lahi ki he ngaahi naunau faka-Takimamata 'a e fonua pea 'oku tupu ai 'a e kaniseli 'a e ngaahi folau vakameili ki he fonua mo hono afe'i ki he ngaahi fonua kaungā'api. Ko e monū foki 'eni ki Tonga ni he 'oku kau 'a Fisi ia hono manakoa taha 'e he ngaahi folau vakameili 'oku nau 'ahia 'a e Tahi Saute.
Na'e ‘amanaki foki ke ‘ahia ‘e he Pacific Pearl ‘a e taulanga he motu faka-Takimamata ko Denarau mo Dravuni ka kuo taa’imalie ai ‘a e ‘Otu Anga’ofa. Koe taha’i ongoongo fakafiefia ‘eni ki he kakai ‘o e fonua kae tautautefito kia kinautolu ‘oku nau fakanimamaka he ngāue fakamea’a pehe ki he kakai ‘oku nau ngāue ‘i he sekitoa Takimamata.
