Hiki Tokolahi Folau ‘Eve'eva Mai: Kau Lelei Ki he Takimamata Featured
Nuku'alofa, 28 2015. Kuo ma'u 'a e fakamatala mei he ongoongo tukuatu 'a e 'Ofisi 'o e Palemia na’e hiki hake’aki e peseti ‘e 38 mei he mahina Me ‘a e tokolahi ‘o e kau folau’eve’eva na’a nau ‘ahia ‘a Tonga ni he mahina ko Sune-Siulai lolotonga ‘a e Katoanga Hilifaki Kalauni.
Ko e toko 9,508 na’a nau tu’uta ‘I Tonga ni ki he katoanga Hilifaki Kalauni ‘o ‘Ena ‘Afifio, Ko e toko 3,761 fakakatoa ai na’a nau tu’uta he ‘uluaki uike ‘e ua ‘o Siulai he ngaahi fepuna’aki fakakomesiale. ‘Oku ‘ikai ke lau ki heni mo kinautolu na’e tu’uta mai he ngaahi fepuna’aki makehe.
Ko e katoanga Hilifaki kalauni mei he ‘aho 27 ‘o Sune ki he ‘aho 7 ‘o Siulai na’e femo’uekina ai ‘a e kolomu’a ‘I he kau folau mei tu’apule’anga mo e kau Tonga mei he tapa kehekehe ‘o mamani.
Ko e ngaahi fika na’e ‘omai mei he Kautaha ki he Fefolau’aki Vakapuna (ATS) ki he tokolahi ‘o e kau pasese na’e tu’uta mai ‘oku anga pehe ni; ‘Epeleli na’e tau mai ‘a e toko 6169 kae folau atu ‘a e toko 6532; Mahina ko Me ne tau mai e toko 6,876 kae folau atu e toko 5,947; Mahina ko Sune na’e tau mai ‘a e toko 9,508 kae folau atu ‘a e toko 5,634.
‘Oku fakafuofua na‘e tokolahiange ‘a e kau folau’eve’eva na’a nau tu’uta mai he hili ‘a e Hilifaki Kalauni koe’uhi koe faingamalie ma’ama’aange ‘a e tikite folau.
NGATA’ANGA
Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; Ngaahi Faka’eke’eke- Email: This email address is being protected from spambots. You need JavaScript enabled to view it.
