Launga'i 'e Tomifa Paea Minisita Takimamata Hon. Semisi Sika Featured
Hon. Semisi Sika Minisita Takimamata mo Tomifa Paea Sea Malolo Poate Takimamata
Nuku’alofa, 28 Siulai 2016. Kuo fakahu atu ki he Komisoni ki he Va mo e Kakai (Tonga's Public Relations Commission) ha launga ‘i he uike kuo’osi ‘o tukuaki’i ‘a e Minisita Takimamata Hon. Semisi Sika.
Ko e launga ‘eni na’e fakahoko ‘e he Sea Malolo ‘o e Poate Takimamata ‘a Tonga (Tonga Tourism Authority Board) Tomifa Paea ‘a ia ‘oku ne tukuaki’i na'e ta’e fakalao ‘a hono veteki ‘e Sika ‘a e Poate.
Na’e fakahoko foki ‘e Tomifa Paea ha tohi ki he kau Minisita pea ‘ave mo e tatau ki he Matangi Tonga (Matangi Tonga Online) ‘o fakaha ai kuo tu’utu’uni ‘e he Poate ‘i he ‘aho 21 ‘o Siulai ke fakahoko ha launga faka’ofisiale fekau’aki mo e Minisita mo e ongo CEO le’ole’o ‘e tokoua ‘o e Potungaue Takimamata.
'Oku fekau'aki tonu 'a e launga ko'eni mo e ta'efiemalie ki hono veteki 'e he Minisita 'a e Poate ko'eni. 'Oku mahino pe foki ki he ongoongo ni na'e fakahoko 'e he Minisita 'a e fakatonutonu ko'eni 'i he'ene 'uhinga na'e 'ikai fakalao 'a hono fili 'o e kau memipa ki he Poate 'i he 2015 'e Lavulavu lolotonga 'ene Minisita Takimamata.
‘I ha tohi ‘a Tomifa Paea ki he folomu ‘a e Nepituno Tonga fekau’aki mo ha ongoongo na’e paaki ai fekau'aki mo hono veteki ‘e Sika ‘a e Poate Takimamata, na’a ne fakaha ai foki ‘a e launga kuo fakahu ‘e he Poate fekau’aki mo e Minisita Semisi Sika fekau’aki mo’ene liliu ‘a e mafai ki he fakamo’oni ‘i he sieke ‘a e Poate 'oku te'eki ai ke fakamafai’i ‘e he Poate.
'Oku mahino foki ki he ongoongo ni 'oku lolotonga ta’ofi ‘e he Pangike BSP hano toe tukuange ha pa’anga mei he ‘akauni ko’eni 'a e Poate Takimamata kae 'oua kuo mahino 'a e halanga 'o e fetukuaki ko'eni pea ko e konga foki ia 'o e launga kuo fakahu 'e Paea ki he Komisoni.
‘Oku te’eki foki ke mahino ‘a e tu’unga ‘o e launga ko’eni pea ‘oku lolotonga fakahoko 'a e feinga ki he Komisoni ki ha’anau komeni fekau’aki mo e kaveinga ni.
Na'e fakahoko 'i he taimi tatau mo e feinga ki he Minisita mo e Potungaue ke 'omai ha'anau tali ki he launga kuo fakahoko 'e Paea ka na'e 'ikai ha faingamalie.
