Metali Koula ‘e 1 Siliva ‘e 2 mo e Polonise ‘e 2 Ma’a Tonga Sipoti ‘Olimipiki Makehe Kau Faingata’a’ia ^Featured

Ko e ngaahi metali ‘a Tonga ni na’e ma’u ia mei he lele mita ‘e 100 ‘a e kakai tangata ‘a ia na’e ikuna ai ‘e Tomasi Ma’asi ‘a e metali koula pea na’a ne toe ma’u mo e metali polonise ki he lele mita 200 ai pe ‘a e kakai tangata.

Na’e ikuna ‘e Tutaleva Fehoko ‘a e metali siliva 'i he lele mita ‘e 50 ‘a e kakai fefine, ikuna ‘e Tevita Tilini ‘a e metali siliva ki he fe’auhi sika nounou (mini javelin) ‘a e kakai tangata pea metali polonise ‘a Fane Helu he fe’auhi tolo sotiputi (shot put) ‘a e kakai fefine. Ko e ola lelei mo’oni ‘eni ki he fonua he ko e kātoa ‘a e toko fā na’a nau fakafofonga’i ‘a Tonga na’a nau ma’u metali kotoa.

‘Oku fakafiefia foki ‘a hono a’usia ‘e Tonga ni ‘a e tu’unga ma’olunga ko’eni ‘o fakatatau ki he tokolahi ‘o ‘etau kau sipoti na’e kau atu ki he fe’auhi ni ‘a ia na’e a’u ki he kau sipoti ‘e toko 6000 tupu ‘oku nau si’i mo’ua he ngaahi faingata’a’ia faka’atamai mei he fonua ‘e 165 kehekehe ‘o mamani na’e kau atu ki he fe’auhi ni.  

Na’e fakahā ‘e he Talekita ‘o e Kautaha ‘Olimipiki Makehe ‘a Tonga (Tonga’s Special Olympic Association) Vanessa Heletā ‘i hano faka’eke’eke ‘e he ongoongo ‘a e Matangitonga ko e ola ta’e hano tatau ‘eni kae hulu atu ‘a e ongo’i ‘e he fānau ‘oku tali lelei kinautolu ‘o ‘ikai fakakehekehe’i. ‘Oku toe pe ‘eni pe koe hā ha talitali lelei ‘e fakahoko ‘e he fonua ma’a ‘etau fānau ko’eni kuo nau ‘ave ‘a e ongoongo lelei ‘o e fo’i piliote ki mamani lahi.