Kualifai ‘a Pita Taufatofua ke kau ki he Olympic Winter Games ‘i Kolea Tonga Featured
Pita Taufatofua
21 Sanuali, 2018. ‘Oku kei fiefia ni ‘o a’u mai pe ki he momeniti ko’eni ‘a e tamasi’i sitaa mili lolo ta’e kofu ‘a Tonga Pita Taufatofua ‘i he’ene kualifai ke kau atu ki he Winter Olympic Games ‘a ia ‘oku ‘amanaki ke fakahoko ki PyeongChang ‘i Kolea Tonga ‘i he ‘aho 9 ki he 25 ‘o Fepueli ‘o e ta’u ni.
Na’e ‘iloa foki ‘a Taufatofua ko’ene mili lolo pea ta’ekofu ‘i he’ene to’o ‘a e fuka Tonga mo taki ‘a e timi sipoti ‘a Tonga ‘i he fe’auhi ‘Olimipiki ‘i Rio de Janeiro, Brazil ‘i he ta’u 2016.
Ko e sipoti foki na’e fakafofonga’i ‘e Taufatofua ‘i he Sipoti ‘Olimipiki 2016 koe taekwondo ka ko’eni kuo maliu ia ki he lova sikii loloa (cross-country) ‘a ia ‘oku fakahoko foki ‘eni ‘i he SIpoti ‘Olimipiki ‘i he taimi momoko.
Ko e kualifai ko’eni ‘a Taufatofua hili ia kau atu kiha lova kualifai na'e fakahoko ki Iceland ‘i he 'aho Tokonaki 20 ‘o Sanuali ‘a ia koe ‘aho ia ‘aneafi.
Koe faingamlie faka’osi pe foki ia kia Taufatofua hili ia ha’a ne tomui ‘i he’ene puna mei Toake ki Croatia ki he fe'auhi kualifai 'a ia na'e fakahoko 'i he kamata'anga 'o e uike ni.
Ko e kau atu ko’eni ‘a Taufatofua koe tokoua ‘aki ia ‘o e kakai mei Tonga ni ‘oku kau atu ki he Sipoti ‘Olimipiki ko’eni he taimi momoko pe koe Winter Olympics 'a ia koe 'uluaki ko Bruno Banini.
