Lototaha ngaahi fonua Kosilio Sipoti Pasifiki ke faka'ilo 'a Tonga ^Featured

Ko e tu’utu’uni eni ‘a e ngaahi fonua memipa mo e ngaahi vahenga ‘e 22 lolotonga ‘a e Fakataha Lahi fakata’u ‘a e Kosilio Sipoti ‘a e Pasifiki na’e fakahoko he Sapate kuo ‘osi, 10 Tisema ‘i Port Vila, Vanuatu pea ko e a’u mai ia ‘a Sipoti Si’i ‘a e Pasifiki ki he kakato ‘a e ‘uluaki uike ‘o e fe’auhi.

Hange pe ko ia kuo ‘osi tuku atu he ngaahi ma’u’anga ongoongo he konga kimu’a ‘o e ta’u ni ‘a e tu’utu’uni ko ia ‘a e Kapineti mo e Pule’anga ke kaniseli ‘a hono toe fakahoko ‘o e Sipoti Pasifiki 2019, pea na’e fakaha ai pe ha tali mei Kosilio Sipoti te nau fakahoko ha ngaue fakalao koe’uhi ko e maumau’i ‘o e aleapau, pea ko eni kuo poupou kakato ki ai ‘a e ngaahi fonua memipa.

Kuo fakahoko atu foki ‘e he Kosilio ‘a e ola ‘o e tu’utu’uni ki he ‘enau Fakafofonga lao ‘oku ngaue ‘i Tonga ni, William Edwards jnr, ke ne kamata ngaue leva ki he ngaahi sitepu ki hono faka’ilo mo e ‘eke maumau ‘a ia ‘oku fakafuofua ki he pa’anga ‘e ‘i he laui miliona.

Ko e tu’utu’uni ko ia ‘a e ngaahi fonua memipa ke fakahoko ‘a e ngaue fakalao ki he Pule’anga Tonga, na’e hili pe ia mei he tu’utu’uni ‘a e Kosilio ke tuli fakataimi ‘a e Komiti Sipoti Pasifiki ‘a Tahiti (pe French Polynesia PGA) “koe’uhi ko e feinga ‘a e Pule’anga ke nau kaunoa pea ‘e uesia ai ‘a e tau’ataina mo e ngaue ‘a e Komiti Sipoti fakafonua mo hono kau memipa.

‘Oku hoha’a heni ‘a e Komiti Sipoti Pasifiki mo Fakafonua ‘a Tonga (TASANOC) ki he ngaahi ngaue pehe ni he ‘e malava ke hoko heni pea ‘e malava ke hoko ai ‘a e tuli fakataimi pe kapusi kitautolu mei he’etau memipa he Kosilio Sipoti ‘o mole ai hotau ngaahi faingamalie ki he Sipoti Pasifiki mo ha to e ngaahi fe’auhi sipoti fakavaha’apule’anga pehee.