Fakanofo ‘e he ‘Ene ‘Afio Tupou VI Fakalangilangi kau va’inga Mate Ma’a Tonga Featured
27 Novema, 2017. Kuo fakamahino mei he Palesiteni ‘o e Kautaha Liiki ‘a Tonga ‘i he mitia faka-sosiale ‘a e finangalo ‘a e Tama Tu’i Tupou VI ke fakanofo ‘a e fakalangilangi ki he katoa ‘a e kau Va’inga ‘a e timi Mate Ma’a Tonga.
Ko e polokalama ko’eni fakatatau ki he tohi faka’ofisiale mei he ‘ofisi ‘o e Lord Chamberlain ‘oku fakaangaanga ke fakahoko ‘i he ‘aho Pulelulu 29 ‘o Novema ni pe ‘i he Palasi Fakatu’i ‘i Nuku’alofa.
Kuo me’ite ‘a e Hau ‘o e fonua ‘i he mateaki li’oa ‘a e fanau Mate Ma’a Tonga pea ‘oku ‘ikai ngata hono ‘ave ‘a e ki’i fo’ipiliote ke ‘iloa he kolope ka ‘oku ne fakatahataha’i ‘a e fonua kotoa pea 'oku fiefia 'a e Tonga kotoa.
