Kaiha’asi e ikuna mei Tonga kae ikuna 'e he Mate Ma'a Tonga 'a e loto ‘o e lau miliona Featured
Ko hono taa'i 'o e pulu mei he nima 'o Andrew Fifita 'i he tata'o faka'osi 'o e va'inga
‘Oku kei fakatumutumu ‘a mamani ‘i he tuli kai vave taha ‘i he hisitōlia ‘o e va’inga ‘akapulu liiki neongo na’e iku ki hono kaiha’asi ‘a e ikuna mei he timi Mate Ma’a Tonga.
Fakatatau ki he lau ‘a e kau tangata ‘iloa ‘i he mala’e ‘o e ‘akapulu liiki koe faka’osinga malie taha ‘eni ‘i he faiva ‘akapulu liiki ‘i he taimi kotoa talu ‘a e kamata ‘a e va’inga ni ‘i hono hisitōlia “the greatest finishes of all time”.
‘I he lau ‘a Willie Mason koe taha ‘o e kau tu’ukimu’a ‘i he mala’e ‘akapulu liiki na’a ne pehe ai koe tu’utu’uni ‘a e fakamaau Matt Cecchin ‘oku ne maumau’i ‘a e laumalie katoa ‘o e fe’auhi ki he ipu ‘a mamani ‘i he mala’e liiki ‘i he ta’u 2017.
Na’e fakahoko foki ‘e Andrew Fififta ‘a e tata’o faka’osi ‘i he va’inga ni ‘a ia koe toe ia ‘a e lau sekoni pea ‘osi ‘a e taimi ka na’e ‘ikai ‘ave ‘e he fakamaau ia ki he fakamaau televīsone kene aofangatuku mai.
‘Oku hoko foki ‘a e faitu’utu’unu ko’eni ‘a e fakamaau Matt Cecchin ke hoko ai a’e longoa’a lahi ‘o ‘ikai ngata pe he kau poupou ‘a e timi Mate Ma’a Tonga ka koe kau manako liiki kotoa ‘i he kolope.
‘I he lau ‘a e kapiteni malōlō ‘a e Kangaroos ‘a ‘Aositeleia ko Laurie Daley na’a ne pehē ai kuo hoko ‘a e tu’utu’uni fakavalevale ‘a e fakamaau kene fa’ao ai ‘a e faingamalie ‘o Tonga ki he fainolo ‘o e ipu ‘a mamani.
Na’e 20 ‘a e kai ‘o e timi ‘a ‘Ingilani ki he 0 ‘a Tonga ‘i he toe ‘a e miniti ‘e 7 pea ‘osi ‘a e taimi pea na’e tafihu ai ‘a e Mate Ma’a Tonga ‘o fakahoko ‘a e tata’o ‘e 4 ‘i loto he miniti pe koia ‘e 7 neongo ‘a hono fakata’e’aonga’i ‘a e tata’o faka’osi.
‘Oku mahino mai ‘oku fakahoko ‘e he kau poupou ‘o e Mate Ma’a Tonga ‘a e launga fekau’aki mo e tu’utu’uni ko’eni ka koe me’a ‘oku mahino mai neongo ‘a hono kaiha’asi ‘a e ikuna mei he timi Mate Ma’a Tonga ka ‘oku ikuna ‘e he Mate Ma’a Tonga ia ‘a e loto mo e ‘atamai ‘o e kau manako liiki ‘e lau miliona ‘i he kolope.
Na’e toe tumutumu ‘aki foki ‘a e ‘afio tonu ‘a e Hau ‘o e fonua Tupou VI ki he va’inga fakaholo mamata ‘a e fanau pea na’e ho’ata mai mei he va’inga ni ‘a e mateki fonua mo e loto’i Tonga.
Na’e ‘ova ahke he toko 25,000 ‘a e kaupoupou ‘o e timi Mate Ma’a Tonga na’a nau ‘i he mala’e Mout Smart ke mamata he va’inga ni.
Fakatatau ki he fakamatala ‘a e ongoongo ‘a e New Zealand Herald kuo a’u ki he toko 27,000 kuo a’utaki ‘enau fiema’u ke toe vakai’i ‘a e tu’utu’uni ‘a e fakamaau ‘i he va’inga faka-hisitōlia ni.
