Logo
Print this page

Hā’ele ‘Ene ‘Afio Tupou VI ke ‘afio tonu ki he semifainolo ‘a e timi Mate Ma’a Tonga Featured

Hā’ele ‘Ene ‘Afio Tupou VI ke ‘afio tonu ki he semifainolo ‘a e timi Mate Ma’a Tonga

23 Nōvema, 2017. Ko e ongoongo fakafiefia ia ki he timi Mate Ma’a Tonga mo e fonua fakalukufua ‘a e ‘amanaki kau atu ‘a ‘Ene ‘Afio Tupou VI ke ‘afio tonu ki he semifainolo ‘a e timi Mate Ma’a Tonga mo e timi ‘a ‘Ingilani ‘oku ‘amanaki fakahoko ki ‘Aokalani ‘i he efiafi Tokonai 25 Nōvema.

Kuo fakapapau’i foki mei he ‘Ofisi Palasi ‘a e Hā’ele ‘a ‘Ene ‘Afio ‘i he ‘a’ahi faka-Tu’i ki ‘Iulope pea ma’u faingamalie ai pe ke Hā’elea ‘a e va’inga faka-hisitōlia ko’eni ‘a e timi Mate Ma’a Tonga.

Na’e toe fakamahino foki mei he ‘Ofisi Palasi na’e a’utaki mai pe foki ‘a e fakaafe mei he Sea ‘o e Fe’auhi ‘Akapulu Liiki ‘a Mamani 2017 Dr. George Peponis Oam, pehe ki he CEO Andrew Hill pehe foki ki he Palesiteni ‘o e Kautaha Liiki ‘a Tonga Semisi Sika.

‘Oku kau ‘eni ia he ongoongo fakafiefia ‘o ‘ikai ngata ‘i he timi Mate Ma’a Tonga ka ki he Tonga kotoa ‘a e ‘amanaki Hā’ele ‘e he ‘Ene ‘Afio ‘a ‘Ene maa’imoa pea koe fakalotolahi mo’oni ‘eni ki he fanau vainga.

Nepituno Media Online © 2015. All rights reserved.