Mau fiefia he ola 'emau fakafofonga'i 'a Tonga: Siosiua Taukei'aho Featured
Siosiua Taukei'aho
22 Novema, 2017. Kuo fakahā ‘e he foueti ‘iloa ‘a e timi Mate Ma’a Tonga Siosiua Taukei’aho kuo nau sio kinautolu na’e fili ke va’inga ma’a honau fonua tupu’anga ki he fu’u totongi mo e ola ‘o e fili na’a nau fakahoko.
Na’e kau foki ‘a Siosiua Taukei’aho, Jason Taumalolo, Manu Ma'u mo David Fusitu'a ‘i he ni’ihi na’e fili kenau fakafofonga’i ‘a Tonga ni ka e ‘ikai koe timi Kiwis ‘a Nu’usila.
‘I ha fakamatala ‘a Taukei’aho ki he ngaahi kautaha ongoongo na’a ne fakamamafa’i ai ‘a ‘ene fiefia mo e toenga ‘o e timi Mate Ma’a Tonga ‘i he mahino ‘oku mahulu atu ‘a e ola ‘o ‘enau fili na'e fakahoko ‘i he a’u mai ki he ‘aho ni.
Ko e hisitolia foki ‘eni ki he timi Mate Ma’a Tonga ‘a ‘ene fuofua kau atu kiha kuata fainolo moha semi fainolo ‘i he fe’auhi ki he ipu ‘a mamani ‘i he mala’e ‘akapulu liiki pea ko e makamaile ia ki he timi Mate Ma’a Tonga ‘o hange koia ‘oku ‘uinga kiai ‘a Taukei’aho.
‘E foki mai foki 'a Taukei’aho mo Peni Filipe Terepo ke kau ki he timi ‘a Tonga ‘oku ‘amanaki fepaki mo e timi ‘a ‘Ingilani ‘i he semi fainolo ‘o e efiafi Tokonaki ‘o e uike ni.
'Oku 'i ai moe fakatu'amelie kiha faiva 'a e Mate Ma'a Tonga 'i 'Aokalani pea mo hano sila'i 'o fakama'u 'a e tu'unga 'o e Mate Ma'a Tonga 'i he hisitolia 'o tuputupu'a.
Timi ‘a Tonga
William Hopoate, Daniel Tupou, Michael Jennings, Konrad Hurrell, David Fusitua, Tuimoala Lolohea, Mafoa'aeata Hingano, Andrew Fifita, Siliva Havili, Siosiua, Taukeiaho, Manu Ma'u, Sika Manu (Kapiteni), Jason Taumalolo.
Kau talifaki
Sione Katoa, Peni Terepo, Tevita Pangai Junior, Ben Murdoch-Masila, Sam Moa, Manu Vatuvei, Joe Ofahengaue, Samisoni Langi
