Logo
Print this page

Fakafo'ou aleapau va’inga 'a Taufa’ao Filise ta’u 40 mo e Kalapu Cardiff Blues 'a Uelesi Featured

Taufa'ao Filise he taha 'ene ngaahi lele'i pulu ma'ae Cardiff Blues Taufa'ao Filise he taha 'ene ngaahi lele'i pulu ma'ae Cardiff Blues

17 ‘Aokosi, 2017. Kuo fakahalaki ‘e he matāpule Malapo ka koe matatolu tutuku ‘a e ‘Ikale Tahi ‘a e anga ‘o e fakafuofua ki he ta’u ‘oku va’inga polofesinale ai ha tangata ‘akapulu ‘i hano toe fakalōlōa ‘ene konituleki mo e Kalapu ‘Akapulu ‘iloa ‘i Uelesi koe Cardiff Blues.

Ko e ta’u 40 foki ‘eni ‘o Filise pea ‘oku anga maheni ‘aki pe foki ‘a e ngata ‘a e tumutumu ‘o e va’inga ‘a e kau ‘akapulu polofesinale ‘i he’enau a’u ki honau ta’u tolungofulu tupu si’i pea fa’a a’u pe ki he ta’u 35 pe laka si’i pe ai.

Ko e ta’u ‘aki foki ‘eni ‘e 11 ‘a e va’inga ‘a Filise ma’a e Kalapu ni talu mei he ta’u 2006 pea kuo tu’o 241 ‘ene fakafofonga’i ‘a e kalapu ni ‘i he va’inga ‘i he lēvolo polofesinale.

‘Oku fakaloloa ‘ehe Kalapu ‘a e konituleki ‘a Filise ‘aki ha ta’u ‘e taha pea ‘e ngata ‘eni mei he ta’u 2018.

‘Oku ‘ikai sola ‘a Tonga ni ki he to’a ni he na’a ne va’inga pe ‘i Tonga ni pea ne hiki atu ki he Bay of Plenty ‘i Nu’usila he ta’u 2000.

Na’a ne kau atu foki ki he timi Super Rugby ‘a e Auckland Blues pehē ki he Waikato Chiefs ki mu’a pea ne hiki atu ki ‘Ingilani ‘o va’inga ai ‘i he Kalapu ‘a e Bath ‘i he fe’auhi Premiership ‘a ‘Ingilani.

Kuo tu’o lahi hono fakafofonga’i ‘e Filise ‘a e timi ‘Ikale Tahi ‘a Tonga pea ‘oku va’inga foki ‘i he tu’unga matatolu.

Nepituno Media Online © 2015. All rights reserved.