Faka’ilo Pule’anga Tonga ‘e he Kosilio Sipoti ‘a e Pasifiki Featured
Palesiteni ‘o e Kosilio Sipoti ‘a e Pasifiki Vidhya Lakhan
5 Siulai, 2017. Kuo fakamahino mei he Kosilio Sipoti ‘a e Pasifiki kuo kamata atu ‘enau ngāue fakalao ki hono faka’ilo ‘a e Pule’anga Tonga fekau’aki mo ‘enau mauamau’i ‘a e aleapau Sipoti Pasifiki 2019.
Kuo faka’ofisiale foki hono talaki mei he Kosilio Sipoti ‘a e Pasifiki ‘a ‘enau fakapekia ‘a e aleapau ko’eni ‘i he uike ni ‘o fakatatau mo e aleapau mo e Pule’anga Tonga.
‘I he’ene pehe leva fakatatau ki he fakamatala mei he Kosilio Sipoti Pasifiki kuopau leva kenau hoko atu ke fakakakato ‘a e tu’unga fakalao ki he me’a ni.
Ko hono fakakakato ‘oku ‘uhinga ia kuopau ke muimui’i fakalao ‘a e aleapau ‘a ia ko hono fakalea ‘e taha ko hono faka’ilo ia ‘o Tonga ni.
Na’e toe fakamahino mei he Palesiteni ‘o e Kosilio Sipoti ‘a e Pasifiki Vidhya Lakhan ‘oku ‘ikai ke ‘uhinga ‘eni koe kumi pa’anga pe koha fa’ahinga taumu’a ka ko e ‘uhinga fakalao mo faka-polofesinale pea ke fakamahino ‘a e mahu’inga ‘o e aleapau mo e tu’unga falala’anga ‘o e sipoti ki he Pasifiki pea ke ‘oua ‘e toe foua ‘a e hala ni ‘a ia ko ‘ene fuofua hoko ‘eni.
‘Oku ‘i ai leva ‘a e ngaahi kupu ‘o e aleapau ko’eni kuo maumau’i ‘e he Pule’anga Tonga pea na’e ‘uhinga foki ‘a hono fa’u ‘o e aleapau ko’eni kene malu’i ‘a e sipoti mei he fa’ahinga me’a ‘e hoko ta’e’amanekina hangē koia kuo hoko ko’eni.
Kuo ma’u foki ‘e he ongoongo ni mo e fakamatala falala’anga ‘oku poupou ‘a e ngaahi fonua ‘o e Pasifiki ki he ngaue fakalao ko’eni ‘oku ‘amanaki fakahoko ki he Pule’anga Tonga.
Kaikehe ko e ngaahi me’a kotoa ko’eni ‘e aofangatuku ‘i ha fakatonutonu fakalao pea ‘oku ‘ikai puli ‘e fakamole ‘a e pa’anga lahi kiai ke malu’i ‘a e Pule’anga.
