‘Ulungia 'Ikale Tahi 'i Uelesi 24 - 6 Featured
Haafe 'a Tonga Sonatane Takulua 'i he taha 'o 'ene ngaahi lele
18 June, 2017. Neongo ‘a e ‘ulungia ‘a ‘Ikale Tahi he timi ‘a Uelesi ‘i he efiafi Falaite 16 Sune ni ka ‘oku mahino mai koe loto mo e feinga na’e ‘i ai pe.
Na’e lava lelei pe foki ‘e he timi ‘a e ‘Ikale Tahi ‘o matu’uaki ‘a e malohi ‘a e teke mei he timi ‘a Uelesi neongo koe ‘aho pe ‘e 4 na’e fakatahataha ai ‘etau fanau va’inga ‘o teuteu fakataha ki he va’inga ni.
‘Oku mahino pe hono ma’u ‘e he tamaiki ‘a e poto’i va’inga ‘i he lēvolo fakavaha’a Pule’anga pea ma’u mo e ivi moe manava ka koe feangai pe ‘eni mo faaitaha ‘oku toe.
Ko e me’a tatau na’e fakamatala ‘e he faiako Toutai Kefu ‘i hano faka’eke’eke ia ‘e he ngaahi kautaha ongoongo hili ‘a e va’inga.
Na’a ne fakahā ai na’e lahi ‘a e ngaahi fehalaaki ‘i he taimi na’e ‘ikai totonu ke hoko ai pea koe ngaahi me’a ke fai ha ako mei ai.
‘I he taimi tatau na’e ma’u ‘e he timi ‘a e loto’i va’inga pea ‘oku fai 'a e hanganaki atu ki he ngaahi va’inga 'i he kaha’u.
Ko e timi foki 'a Uelesi 'oku tokolahi ai 'a e kau va'inga fo'ou he koe konga lahi 'o e timi 'oku kau atu ia ki he timi 'a e Laione 'a 'Ailani mo Pilitānia 'oku lolotonga 'a'ahi ki Nu'usila.
