‘Ikai ha totonu ‘a e Pule’anga ke kaniseli Sipoti: Lord Sevele ^Featured

‘I he fakamatala ‘a Lord Sevele koe mafai koia ‘oku ‘i he Kautaha Sipoti pe ia ‘a Tonga TASANOC mo e Kosilio Sipoti ‘a e Pasifiki (Tonga Association of Sports and National Olympic Committee TASANOC and the Pacific Games Council).

Na’e hoko atu ‘a Sevele ‘o pehe ‘oku malava pe ke to’o ‘a e poupou ia ‘a e Pule’anga ka ‘oku ‘i he mafai pe ia ‘o e ngaahi sino kuo fakamafai’i kenau fakahoko ‘a e ngāue ni mo e kakai mamahi’i fonua ‘o Tonga ke fakahoko ‘a e ngāue mahu’inga ni ma’ae hakotupu ‘o e fonua mo e kaha’u ‘o Tonga.

‘I he fakamatala ‘a Sevele kapau ’e ‘ikai ketau malava ‘eni pea he’ikai pe ke tau toe malava ke fakahoko ha ngāue pehe ni ‘i he kaha’u.

Fakatatau ki he fakamatala ‘a Sevele ko hotau fatongia ‘eni ki he’etau fanau mo Tonga pea ‘oku ‘ikai kehe ‘a e langa mala’e sipoti mo e naunau ki he teuteu ‘o e sipoti ko’eni mo hono langa ‘o e mala’e vakapuna, uafu, hala pule’anga mo e ngaahi ‘apiako.

‘Oku faka’amu foki ‘a Sevele ketau tu’u ‘o fakahā ki he Palēmia kapau he’ikai tene lava pea mavahe ki he tafa’aki he koe ‘uhinga ‘oku ‘omai ‘oku ‘ikai ke malohi.

Ko e tali foki ‘eni ‘a Sevele ki he Matangitonga hili hano fakahā ‘e he Palēmia ‘i ‘Aokalani he faka’osinga ‘o e uike kuo ‘osi pea faka’eke’eke ‘e he Letio 87.5 ‘i he pongipongi Mōnite 'o e uike ni kuo kaniseli ‘e he Kapineti ‘a hono teu fakahoko mai ‘o e Sipoti ‘a e Pasifiki Tonga ki Tonga ni.

Na’e toe fakahā foki ‘e Sevele na’e makatu’unga ‘a e fakamatala ‘a e Palēmia ‘Akilisi Pohiva ‘i he lipooti motu’a ‘a e IMF ‘i he 2013 mo e ADB ka ‘oku toe fakahā pe foki ‘e he ongo kautaha ni ‘e kaunga lelei ‘a e sipoti ki Tonga kapau ‘e fakahoko lelei mo fakapotopoto hono fokotu’utu’u pehe ki hono fakalele pea ma’u moha tokoni mei muli mo e ngaahi kautaha tokoni.

‘I he fakamatala ‘a Sevele na’a ne pehe koe taimi totonu ‘eni ke tau ma’u ai ha ngaahi senitā sipoti mo e naunau ‘oku lelei mo fakaonopooni pea ka ‘ikai ‘i he taimi ni ‘oku ‘ikai mahino pe ‘e toe lava pe ‘ikai.

Na’e fakafuofua ‘e Lord Sevele ‘e peseti pe ‘e 30% ‘a e tokoni ‘a e Pule’anga ki he fakamole fakakatoa pea kuo fakamo’oni ‘a e Siaina kenau tokoni mai ‘aki ‘a e pa’anga ‘e $56 miliona. Kuo tokoni mai ‘e Nu’usila ‘a e pa’anga ‘e 3 miliona pea ‘oku ‘amanaki ke tokoni mai’aki ‘e ‘Aositelelia ‘a e pa’anga ‘e 5 miliona.

Kaikehe na’e hili ‘a e mahino ‘e fakahoko mai ‘a e sipoti ki Tonga ni ‘i he 2012 na’e fakafuofua ‘e fe’unga mo e pa’anga ‘Ameliaka ‘e USD$70 miliona ‘a ia koe pa’anga Tonga ia ‘e meimei $140 Miliona ‘a e fakamole ki he Sipoti 2019.

Na’e faka’osi ‘aki ‘e Lord Sevele ‘ene fakahā ‘e malava pe ke tautea ‘a Tonga ni ‘i he ‘ikai kenau muimui ki he’enau tukupā ka ‘oku ‘ikai kene tui ‘e hoko ‘eni.

Ko e me’a ‘e ngali hoko ‘i he lau ‘a Sevele ko’enau omai ‘a e Kosilio Sipoti ‘a e Pasifiki ki Tonga ni ke feinga’i ke tu’u fakataha ‘a e ngaahi kupu fekau'aki ‘i Tonga ni pea ke feinga’i ke lava fakahoko a e sipoti.

‘Oku te’eki foki ke ‘i ai ha fakamatala faka ’ofisiale ia mei he ‘Ofisi ‘o e Palēmia fekau’aki mo e me’a ni ka ‘i he lolotonga ni ‘oku lolotonga folau ‘a e Palēmia ia ki Taileni.