Kaniseli ‘e he Kapineti Sipoti Pasifiki 2019 ^Featured

Na’e fakamahino ‘eni ‘e he Palēmia ‘Akilisi Pohiva ‘i hano faka’eke’eke ia ‘e he ongoongo ‘a e Letiō 87.5 ‘i he pongipongi ‘o e ‘aho ni.

Na’e toe fakamahino foki ‘e he Palēmia na’e fai ‘a e fakataufolofoloa Ki He’ene ‘Afio pea na’a ne mokoi ke fakahoko pe ‘a e me’a ‘e lelei ki he fonua.

Ko’ene ngata ‘eni ha toe fehulunaki pe koha toe longo'a'a ‘i he ngaahi tafa’aki ‘oku nau fengāue’aki ki hono teuteu ‘o e sipoti pea ko'ene mahino mo'oni 'eni 'e 'ikai toe fakahoko mai ha sipoti.

Ko e me’a leva ‘oku hoko atu kiai koe ngāue atu 'a e Pule'anga ki hono fakapekia ‘a e ngaahi lao mo e ngaahi tu’utu’uni na’e fakapaasi ki hono teuteu ‘o e sipoti.

Na’e toe me’a foki ‘a e Palēmia ‘e kei hokohoko atu pe ‘a e ngaahi langa hangē koia kuo ‘osi mahino ‘e fakahoko ka 'oku te'eki ke fakamahino mai koe ha 'a e langa 'e hoko atu.

Ko e makatu’unga lahi taha hono kaniseli ‘o e sipoti koe tu’unga fakapa’anga ‘o e fonua ‘a ia ‘oku tui 'a e Pule'anga makatu'unga he ngaahi fale'i 'o kau ai 'a e Pangike 'a Mamani (World Bank) mo e Pangikē 'Esia moe Pasifiki (ADB) ‘e kaunga kovi ki he fonua.

'Oku mahino pe foki 'a e 'uhinga 'oku tuku mai 'e he Palēmia mo e Pule'anga pea 'oku fai e faka'apa'apa kiai ka 'i he taimi tatau oku fai foki hono fehu'ia 'a e taimi 'oku fakahoko ai 'a hono kaniseli hili ia ha ta'u nai 'e 5 'a e kamata mai 'ae teuteu.

'Oku 'i ai nai ha toe 'uhinga ange makehe mei he 'uhinga faka-'ikonomika 'o hangē koha 'uhinga faka-politikale pe vā faka tukufakaholo mo fakataautaha 'oku fakahoko fakatu'upakē ai 'a e tu'utu'uni ko'eni.?

Ko hā na'e 'ikai ke fai mo fakakaukau'i ai 'a e ngaahi fale'i ko'eni kimu'a atu he na'e 'osi tuku mai pe ki mu'a.?

Ko hono kaniseli ‘eni 'a hono 'amanaki fakahoko mai 'a e Sipoti ‘i he toe pe nai ‘a e ta’u ‘e 1 mo e konga pea fakahoko.