Kamata 'a e ngaue fakalelei ki he Pa'ake Teufaiva Featured
Faitaa 'a e 'Ofisi Haikomisiona Nu'usila
11 ‘Epeleli, 2017. Kuo kamata 'a e ngaue fakalelei ki he Pa’ake Teufaiva hili ia ha laaulea ki ai ‘a e fonua ‘o kau ai mo e ngaahi mitia ‘i Tonga ni mo muli foki.
Ko e kamata ko’eni ‘o e ngaue koe ongoongo fakafiefia ia ki he kakai e fonua ‘i he teuteu atu ko’eni ki he Sipoti ‘a e Pasifiki ‘i he ta’u 2019.
‘I hano lipooti ‘e he ongoongo ‘a e Matangitonga, ‘oku ‘amanaki ke ‘osi ‘a e konga ‘uluaki ‘o e ngaue ko’eni ki Sune ‘o e ta’u ni pe pea koe konga ua ki Tisema.
Ko e konga foki ‘o e poloseki ko’eni ‘oku faka-pa’anga ia ‘e he Pule’anga Nu’usila ‘a ia koe ngaue ki he loto mala’e mo e konga ‘o e ngaahi naunau pea koe sitetiume leva mo e lele’anga ‘oku ‘amanaki fakapa’anga ia ‘e he Pule’anga Papua New Guinea.
Na’e ‘amanaki foki ke fakahoko mai ‘a e tau ‘akapulu tesi ‘a e ‘Ikale Tahi mo Uelesi ki he pa’ake ni ‘i he mahina ko Sune 'o e ta'u ni ka na’e ‘ikai ke lava koe ‘ikai fakahoko ha ngaue fakalelei ki he Pa'ake Teufaiva.
Na’e toe fakaha foki ‘e he Sea Poate ‘Akapulu ‘a Tonga Fe’ao Vunipola ‘oku ‘amanaki fakahoko mai ki Teufaiva ‘a e tau ‘akapulu tesi mo Fisi mo Ha’amoa he konga kimui ‘o e ta’u ni ka ‘oku te’eki ke mahino mai.
