Fakahoko mai tesi 'Ikale Tahi mo Fisi mo Ha'amoa ki Teufaiva 'i Siulai Featured
Timi Ikale Tahi lolotonga 'enau fakamalohi sino 'i he Pa'ake Teufaiva
24 Ma’asi, 2017. ‘Oku ‘i ai ‘a e ‘amanaki ‘e malava ke fakahoko mai ‘a e tesi ‘a e ‘Ikale Tahi mo Fisi mo Ha’amoa ki Tonga ni ‘i he mahina ko Siulai ‘o e ta’u ni.
Ko hono fakaha ‘eni ‘e he Sea mo e CEO ‘a e ‘Unioni ‘Akapulu ‘a Tonga Fe’ao Vunipola hili ‘a e fakataha mo e kau ‘ofisiale mei he Poate ‘Akapulu ‘a Mamani ‘aneafi 23 Ma’asi 2017.
‘I he fakamatala ‘a Vunipola ki he ongoongo ‘a e Matangitonga na’a ne pehe koe fakataha lelei foki ‘eni pea ‘oku lolotonga ‘i heni foki ‘a e kau ‘ofisiale mei he Poate ‘Akapulu ‘a Mamani (IRB) ke vakai ki he tu’unga ‘o e pa’ake Teufaiva.
Ko e kau fakafofonga mei he IRB na’e toko 3 pea moe fakafofonga ‘e taha mei he kautaha Nu’usila (TURF) ‘oku ‘amanaki kenau fakahoko ‘a e fakalelei ki he ‘elia ‘oku fakahoko ai ‘a e va’inga.
Na’e fakaha foki ‘e he fakafofonga mei heTURF ko e tu’unga ‘o e musie ‘i he mala’e ‘oku fakafiemalie pe pea koe me’a tatau ‘i he vakai ‘a e kau ‘ofisiale mei he IRB.
‘I he fakamatala ‘a Vunipola ‘oku fakafuofua ‘e fakahoko mai a e tesi mo Ha’amoa ‘i he ‘aho 1 ‘o Siulai pea ‘aho 8 leva mo Fisi ka ‘e toki aofangatuku kotoa ‘a mui mei he IRB.
Ko e onongoongo fakafiefia foki ‘eni ki he fonua kapau ‘e tu’ulahoko ai pe ‘a e ‘amanaki ko’eni he koe talu ‘a hono fakahoko fakamuimui mai ‘a e tesi fakavaha’a-Pule’anga ki he pa’ake Teufaiva ‘i he ta’u 2009.
