‘Ulungia ‘a Pita Taufatofua kae ikuna ‘a Tonga ‘i he Kolope Featured
Ko Pita Taufatofua 'i he'ene lulululu mo Mardani 'o 'Iulani hili 'a 'ena va'inga. Faitā 'a e Reuters
21 ‘Aokosi, 2016. Na’e ‘ulungia foki ‘a e ‘ofa’anga ‘o e fonua Pita Taufatofua ‘i he’ene va’inga mo e fika 2 ‘i mamani he pauni 'ova he kilo 'e 80 ko e tangata ‘Iulani (Iran) ko Sajjad Mardani.
Ko Taufatofua foki ‘oku fika 15 ‘i mamani 'i he pauni ko'eni pea ko ‘ene fuofua va’inga ‘eni ‘i he sipoti ‘olimipiki ‘i Rio.
Na’e ikuna foki ‘e Mardani ‘a Taufatofua ‘aki ‘a e poini ‘e 16 ki he 1 pea iku ke fakangata pe ‘e Mardani ‘a e va’inga ni ‘i he takai hono ua ‘o ‘ikai a’u ki he takai tolu makatu’unga ‘i he vā mama’o ‘a hina poini ‘o laka hake he poini ‘e 12 hili ‘a e takai hono ua.
Na’e mahino pe foki ‘a e pupou ‘a e kau mamata kia Taufatofua pea na’e hā pe ia he’enau kalanga Tonga!!!, Tonga!!!, Tonga!!! ‘o fakapapau’i ai pe ‘a hono manakoa ‘etau tamasi’i ‘e he kakai mo e kau mamata. Ko e talu foki pe ‘a e tākai lolo ‘a e mana’ia mei he Pako ‘i he’ene taki mo to’o ‘a e fuka Tanga he ouau huufi ‘o e sipoti mo e hēhē’ia ‘a mamani ‘i he talavou ni.
‘Oku tumutumu foki heni ‘a hono tu’uki ‘o Tonga ni ki he laui miliona ‘i mamani pea mo e a'usia 'e Taufatofua 'ene misi kene hoko 'o kau ki he fe'auhi he sipoti 'Olimipiki.
Neongo ‘a e ‘ulungia ‘a Taufatofua ka ‘oku ikuna ‘a Tonga ‘i mamani ‘i hono ‘ekea ‘e he kakai pea hoko ai ‘a Taufatofua ko e tokotaha talanoa’i taha ‘i mamani lolotonga ‘a e Sipoti ‘Olimipiki ‘i Rio.
Ko e ‘amanaki lelei’anga eni ki he fonua mo e ‘amanaki ‘e ‘omai ‘e he tu’uaki ko’eni ha kau folau’eve’eva ki he fonua pea tokoni ki hono langa hake hotau ‘ikonomika.
Mālō Pita Taufatofua e ngāue faka-‘Amipasitoa lelei ma’a e si’i fo’i Piliote.
