Kaiha'asi 'e Pita Taufatofua tokanga 'a mamani 'i hono fakaava 'Olimipiki 'i Rio Featured
Pita Taufatofua 'oku ne takai lolo mo vala tapa'i ngatu 'i he'ene to'o 'a e fuka Tonga
7 'Aokosi, 2016. 'Oku lolotonga hehe'ia 'a e tokolahi 'i mamani 'i hono kaihaasi 'e he matapule mei he Fo'i'one'one ko Pita Taufatofua 'a e tokanga 'a e kau mamata 'e laulau miliona lolotonga 'a e ouau fakaava 'o e sipoti 'Olimipiki 'i Rio'i he po Falaite ka ko e ho'ata tokonaki ia he taimi 'a Tonga ni.
Ko e hehe'ia ko'eni he fakafotunga moe teunga na'e tui 'e Taufatofua 'a ia na'a ne vala tapa'ingatu pea takailolo 'o hange ko e angamaheni 'a e teunga faiva faka-Tonga hotau ki'i fonua ni. 'Oku hoko foki 'eni ko hono tu'ut'uaki lelei 'o Tonga ni ki Tu'apule'anga pea 'oku kau 'a Taufatofua ko e tangata manakoa taha ia he facebook mo e twitter pehe ki he nfaahi misita fakasosiale kehe 'i he ngaahi 'aho ni.
'I he fakalea 'a e ngaahi komeni he mitia fakasosiale 'oku pe he 'e he ni'ihi "oku totonu ke foaki katoa e ngaahi metali ma'a Tonga", "kuo ikuna 'e Tonga e metali koula te'eki kamata e sipoti, "'oku tu'u 'i fe 'a Tonga?", 'e anga fefe ha'aku fetaulaki mo Taufatofua?, "kuo mei tu'u 'eku manava he sio ki he tangata", "ikai toe lava au 'o lea", "koau teu mate valelau" mo e ngaahi komeni kuo lau mano 'i he mitia faka sosiale.
'Oku malie foki he 'oku 'alu fakataha pe foki 'a e manakoa 'a e teunga 'o Taufatofua, sino lelei, mo hono talavou he ko e tangata ni foki 'oku fa'a ngaue 'aki 'e he ngaahi kautaha tu'uaki ko e motolo 'i 'Aositelelia pea 'oku 'uhinga ai 'a e laulausiva 'a e tokolahi kae tautautefito ki he kakai fefine 'i he mitia faka-sosiale.
Ko Taufatofua ko hono ta'u 32 'eni pea 'oku ne fakafofonga'i 'a Tonga ki he fe'auhi Taekwondo. 'Oku kau 'eni hono tu'uaki lelei 'i he tafa'aki faka-Takimamata 'o Tonga ni ki Tu'apule'anga.
