‘Ulungia Tonga A ‘i he Timi A ‘a Siapani Featured
9 March, 2016. Kuo ikuna ‘e he Timi A ‘a Siapani ‘a ’enau fuofua va’inga ‘o e fe’auhi World Rugby Pacific Cup Challenge ‘aki ha’anau fakamamahi’i ‘a e Timi A ‘a Tonga ‘aki ‘a e kai koe 26 ki he 8.
Na’e mahino ‘a e mateuteu ange ‘a timi ‘a Siapani ‘o tautautefito ki he taimi ‘oku nau ‘oho kai ai ka na’e lava pe ‘e he Timi Tonga A ‘o ta’ota’ofi ‘o nofo pe ‘a e kai ‘i he 10 ‘a Siapani ki he 8 ‘a Tonga ‘i he taimi malōlō ‘a e va’inga.
Ko e kai ‘o Tonga na’e ma’u ia mei he tata’o ‘i he tu’u pē ‘a e konga ‘uluaki ‘a Tu’ihakavalu Ika pea moe ‘aka tautea ‘e taha. Na’e fakahoko foki ‘e he Timi A ia ‘a Siapani ha va’inga fakaholomamata mo nau pule’i lelei a’ e va’inga ‘i he konga hono ua pea nau toe tanaki mai mo e fo’i poini ‘e 16 ki honau kai ‘o ‘oasi ‘a e taimi kuo nau ‘ikuna ‘aki ‘a e 26-8.
‘Oku hokohoko atu pe ‘a e fe’auhi ‘a ia na’e fetaulaki e efiafi ai pe ‘o e ‘aho ni ‘a e Timi Samoa A mo e Fiji Warriors. Ko e tau foki ‘eni ‘oku fakahoko ‘i Fisi ‘i he ANZ Stadium.
