“ MĀLÕ KAUFUSI MO LOHOLOHO...Me'a pangó kuo 'osi fai e kole ngāue ki he Pule'angá, pea na'e talamai kuo u fu'u motu'a, lahi hake he ta'u 60, neongo na'e tu'u kimu'a 'eku hisitõlia akó mo e ngāué. Ko e "age discrimination" ia, ka e toloi atu ia ki ha'a tau toki tālanga 'i he kaha'ú.
1) Ko e fakaangá 'oku lea 'aki mei he taukei ngāue (na'a ku 'osi fokotu'u 'a e Utah Rugby Union, pea u palesiteni ta'u e 5; na'e 'ikai fiema'u ha tokoni 'a e Pule'anga Utah pe 'Ameliká), mo e taukei ako ke matala e 'atamaï 'i hono fokifokihi 'a e ngaahi tu'utu'uni 'a e Pule'angá. He 'oku nau fai 'aki 'a e mafai ta'e fakangatangata 'o faka-kuihi 'aki e mātu'á 'oku nau fiema'u mo falala ki he totonú.
2) Ko e mafai 'o e mītiá ke fokifokihi 'a e ngāue 'a e kau taki faka-Pule'angá, kau Taki Lotú, kau Taki Ako'angá, mo e ngaahi Pisinisí (private sector). 'Oku fai 'aki 'a e 'atamai fehufehu'i (critical thinking); faka-kata'i (satire); 'atamai faka-'uhinga'i totonu (logic); faka-fehoanaki ki he puipuitu'á (history); mo 'etau tui ki he faitotonu, angama'a, mo e angatonu (morality).
3) Ko e 'uhinga ia na'e hoko ai 'a e "Reformation" 'o mavahe 'a e ngaahi kautaha lotu Kalisitiané (protestants) mei he Siasi Katoliká, pea liliu 'a e ngaahi pule'angá (revolutions) ko e lahi 'o e taki hala'l 'o e kakaí. 'Oku kei hoko pe 'i he ngaahi 'ahó ni 'enau fehālaakí, maanumanu, kākā mo e loi.
4) Tau monū'ia 'i Tongani 'oku 'omai 'e he Konisitūtoné 'a e tau'atāiná ketau pulusi 'etau ngaahi fakakaukaú 'i he mītiá ta'e 'i ai ha'a tau ilifia ki he Pule'angá.
5) Pea 'oku 'ikai ketau ilifia ki he manuki mo e fakamanamana mai 'a e kakaí. Ko e konga ia 'o e temokalatí, ketau tau'atāina ketau fili. ”