Kamata ‘a e Konifelenisi Hono 92 Siasi Uesiliana Tau’atāina ‘o Tonga Featured
Faifekau Dr. 'Ahio Palesiteni & Faifekau Dr. Tevita K. Havea Sekelitali Lahi SUTT
Nuku'alofa, 8 Siulai 2015. ‘Oku kamata he ‘ahoni ‘aho 8 Siulai ‘a e Konifelenisi Hono 92 ‘a e Siasi Uesilina Tau’atāina ‘o Tonga. Ko e kamata ‘eni ‘a Konifelenisi hili hano toloi fakataimi mai pe mei taimi anga maheni kae lava kakato ‘a e Ouau Hilifaki Kalauni ‘o ‘Ene ‘Afio Tupou VI.
Na’e lava foki ai pe ‘i he ho’ata ‘o e ‘aho ni mo hono fili ‘o e Palesiteni ‘o e Siasi ‘a ia na’e kei loto lelei pe ‘a e Hou’eiki Memipa ‘o e Konifelenisi ‘i ha paloti ke kei hoko atu ai pe ‘a Faifekau Dr. Ahio ‘i he lakanga Palesiteni. Na’e toe loto ai pe ‘a Hou’eiki memipa ‘o e Konifelenisi ke toe hoko atu pe’a Faifekau Dr. Tevita Koloa’ia Havea ‘i he lakanga Sekelitali Lahi ‘o e Siasi.
Na’e lava atu ai pe ‘a Lord Tangi, Fotu, Tau’atevalu mo Tevita Vaipuna ‘o fakahoko ‘a e ola ‘o e paloti ki he Palesiteni mo e Sekelitali Lahi ‘o e Siasi ki He’ene ‘Afio ‘i he houa efiafi ‘o e ‘aho ni.
Ko e Konifelenisi foki hono 92 na’e kamata ia ‘anepō Tusite 7 ‘i Siulai ‘aki ha pō lotu fakafe’iloaki mo e Malanga Fakafeta’i ‘o e Hilifaki Kalauni ‘a ia na’e fakahoko ia ‘e he Palesiteni Malōlō Faifekau Dr. ‘Alifeleti Malakai Mone.
‘Oku ‘amanaki ke lele pe ‘a e polokalama ‘a e Konisfelenisi ‘o ngata mei he ‘aho Mōnite ko hono 13 ‘o Siulai ai pe ‘a ia koe Mōnite ia ‘o e uike kaha’u.
‘Oku hokohoko atu ai pe foki ‘a e kakai ‘a Nuku’alofa he hokohoko ‘a e ngaahi kātoanga pea neongo koe hoko atu ‘eni ki he kātoanga fakalaumalie ka ‘oku ‘ikai puli ‘a ‘ene kei hokohoko atu pe ‘a ‘ene kau lelei ki he ‘ikonomika ‘o e fonua.
