Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Mahino Le'o Kau Taki Lotu: 'Ikai Tali CEDAW Featured

Mahino Le'o Kau Taki Lotu: 'Ikai Tali CEDAW

Nuku'alofa.

Ko e vakai ‘a e Fakataha’anga Fakafonua ‘a e kau Taki Lotu ‘o Tonga fekau’aki mo e Konivesio Ke Ta’ofi ‘a Hono Fakafaikehekehe’i ‘o Ha’a Fafine (Convention of the Elimination of All Forms of Discrimination Against Women – CEDAW)

‘Oku mau fakatapu ki he Tu’i ‘o Tonga, Tupou VI, mo e Fale ‘o Ha’a Moheofo, Hou’eiki Nōpele ‘a ‘Ene ‘Afio, ‘Eiki Palēmia ‘o Tonga, ‘Eiki Sea ‘o e Fale Alea, mo e kakai kotoa ‘o e fonua.

‘Oku ‘oatu ‘a e fakamatala ni mo e loto faka’apa’apa mo’oni ke fakahā ‘a e TUI mo e TU’UNGA ‘oku ‘i ai ‘a e kau Taki Lotu ‘o e fonua fekau’aki mo e kaveinga fakavaha’apule’anga ‘a ia ‘oku fai ‘a hono tālanga’i ‘i Tonga ni ‘o kau ai ‘a e kakai ‘o e fonua mo e Lotu, ‘a ia ko e Talite ke ta’ofi ‘a hono Fakafaikehekehe’i ‘o Ha’a Fafine pe CEDAW, Convention on the Elimination of All Forms of Discrimination Against Women.

‘Oku mau tui ‘oku mahu’inga ke fakahā ‘a e fakakaukau ‘a e mātu’a tauhi ‘o e Lotu fekau’aki mo e kaveinga ni, pea mo hono tu’unga he lotu faka-Kalisitiane he ‘oku kaunga tonu ia mo e mo’ui fakalotu mo e nofo melino mo ma’uma’uluta ‘a e kakai ‘o e fonua.

‘Oku fai ‘a e faka’apa’apa ki he ngaahi tefito’i tui taautaha, ngaahi fa’unga ngāue pe fakahoko fatongia, pea pehē foki ki he ngaahi tefito’i tui fakalotu mo e tokāteline ‘a e ngaahi Siasi taautaha, pea ‘e ‘ikai fai ha lave ki ai ‘i he fakamatala ni. Ka ko e vakai fakalukufua pe eni ki he nofo ‘a kāinga ‘i he tui faka-Kalisitiane, ‘oku tu’unga ai ‘a e ‘oatu ‘o ‘emau vakai.

‘Oku mau fakamālō lahi ‘i he tokangaekina ‘o e Fakataha’anga Fakafonua ‘o e Kau Taki Lotu kuo fai mai mei he Pule’anga, ke fakahoko ‘a e fuofua fakataha ‘i he vaha’a ‘o e Pule’anga mo e kau fakafofonga ‘o e Kau Taki Lotu, ‘a ia na’e fakahoko eni ‘i he efiafi Tu’apulelulu 9 ‘o ‘Epeleli 2015. Na’e me’a mai ai ‘a e ‘Eiki Minisitā ‘o e Potungāue Ngaahi Ngāue Fakalotofonua, Hon Sosefo Fe’ao Vakatā, Talēkita Pule ‘o e Potungāue, Lopeti Senituli, mo e ‘Ateni Seniale Le’ole’o, ‘Aminiasi Kefu ke fakama’ala’ala mai ‘a e Talite ko eni ki he Kau Taki Lotu.

Na’e fakahā ai ‘e he kau fakafofonga ‘o e Kau Taki Lotu, ‘a ‘emau poupou kakato ki he ta’ofi ko ia ‘o hono fakaehaua ‘o e kakai fefine. ‘Oku mau tui ta’etoeveiveiua ki hono faka’apa’apa’i ‘a e ngeia mo e langilangi ‘o ha’a fafine ‘o taau mo e Lotu. Pea ko e loto ia mo e faka’amu ‘a e kau Taki Lotu ke foaki ‘a e faingamālie kotoa pe ‘oku malava ke foaki ki he kakai fefine ‘o fakatatau ki honau tufakanga kuo foaki ‘e he ‘Otua kiate kinautolu.
‘Oku mau fakamālō ‘i hono tokangaekina ‘e he Pule’anga ‘a e Lotu ‘o ‘ai ‘a e ngaahi fakangatangata (reservations) ki he ngaahi Kupu ko ia ‘oku felāve’i tonu mo e ngaahi kaveinga ‘oku fepaki mo e tui ‘a e Kalisitiane hangē ko ia ‘oku hā ‘i he Kupu 10(h) mo e 12(1) fekau’aki mo e fakatō tama pea mo e Kupu 16 fekau’aki mo e mali ‘a e tangata mo e tangata pea mo e fefine mo e fefine.

Makatu’unga ‘i homau fatongia ko e kau tauhi ‘o e tākanga ‘a e ‘Otua Mafimafi ‘i he malumalu ‘o e Lotu ‘i he fonua ni, kuo pau ke fai ‘a ‘emau lelei taha ke fakahoko ‘a e fatongia kuo ui kimautolu ki ai ‘e he ‘Otua. Pea ‘oku mau fakatauange ‘oku kei fai ‘a e vakavakaō ‘a e “Pule’anga” mo e “Lotu”, ko e ma’uma’uluta’anga ia ‘o e fonua ‘o Tupou mo Hou’eiki.

Ko e fakataulama ‘a e Kau Taki Lotu ki he fonua, ‘oku fai ai ‘a e fiefia ‘i he ‘ilo pau ko homau fatongia totonu, hangē ko hono fakamanatu mai ‘e he Hau ‘o Tonga kuo unga fonua, Kingi Siaosi Tupou V, ‘i he‘ene Tō Folofola Huufi ‘o e Konifelenisi Hono 87 ‘a e Siasi Uēsiliana Tau’atāina ‘o Tonga,‘i he Falelotu Senituli, Nuku’alofa, ‘i he ‘aho 24 ‘o Sune, 2010:

………..Ka ‘i Novema ‘o e ta’u ni, ‘e kamata leva ke pule’i fakatemokalati hotau fonua.  Pea neongo ‘oku loto taha ‘a e Pule’anga mo e Falealea ke fai ‘a e ngaahi liliu ko’eni, pea ‘e hā leva ‘i hotau fonua ni ‘i he kaha’u ha ngaahi ‘ahi’ahi te nau muimui mai he pule fakatemokalati mei mui.
Ko e ‘uluaki ‘ahi’ahi ‘e hā mai, ko hono kamata ke fakaanga’i ‘e he fa’ahi fakatemokalati ‘a e ngāue mo e lotu faka-kalisitiane hono kotoa.  He’ikai ke makatu’unga ‘i ha loto taaufehi’a pe loto kovi, ka koe’uhi te nau ‘ekea ‘a e ngaahi lao ‘a e fonua, pea ngalingali na‘e tali koe’uhi ko e tui faka-Tohitapu.
Ko hono teuaki ia ke fakapekia ‘a e ngaahi lao ko’eni, kae fetongi’aki ha lao ko ee te ne fakangofua ha ngaahi ‘ulungaanga ‘oku tapui ‘i he Tohitapu.
Pea ‘e fakamu’omu’a mai foki ha ngaahi ‘uhinga fakafaito’o, pe ko ha ngaahi ‘uhinga fakahekeheke, ka ko e taumu’a ‘e kei tatau pe. ………….

‘Oku mahu’inga’ia ‘a e Kau Taki Lotu ki he fakatokanga ko eni ki honau fatongia ki hono tauhi mo fakatolonga ‘a e Tui Fakafolofola ‘i hotau fonua ni.
Ko e fatu fonua ‘i onopooni, na’e fatu‘aki ‘a e makatu’unga ‘oku “Faka-‘Otua” pea mo “Fakalotu”. Pea ‘oku hā mahino eni ‘i he Kupu I ‘o e Konisitūtone ‘o Tonga, ‘a ia ‘oku pehē:

“Ko e me’a ‘i he hā mai ko e finangalo ‘o e ‘Otua ke tau’atāina ‘a e tangata, ko e me’a ‘i He’ene ngaohi ‘o toto pē taha ‘a e kakai kotoa, pea ko ia ‘e tau’atāina ‘o ta’engata ‘a e kakai Tonga mo e kakai kotoa pē ‘oku nofo ni pea ‘e nofo ‘i he pule’anga ni …..”

Ko e toenga ‘o e Konisitūtone, ‘oku hā ai ko e finangalo ‘o e ‘Otua ke tu’u tau’atāina ‘a e Tonga ki he’enau:

“ …..mo’ui mo honau sino mo honau taimi ke kumi mo ma’u koloa pea ke fa’iteliha ki he ngāue mo e fua ‘o honau nima pea ke pule’i tafataha pē ‘e kinautolu ‘a e ngaahi me’a ‘anautolu.”

Ko e ngaahi langi mama’o ia ‘a e Tu’i, Siaosi Tupou I, ki he Konisitūtone ‘a hono kakai. Ko e Konisitūtone ko ia ‘oku kei malu lelei ai ‘i loto ‘a e kakai ‘oku nau tui ki he ‘Otua. Hangē ko ia ‘oku hā ‘i he Kupu I mo hono fakalea ‘oku hā ‘i ‘olunga.

Kapau te tau fai ha me’a ‘oku fehalaaki mo e finangalo ‘o e ‘Otua ki he tau’atāina ‘a e kakai, pea ‘oku tau tui ko e monuka ia ‘a e Konisitūtone. Ko e finangalo ‘o e ‘Otua Mafimafi ke tau’atāina ‘a e Tonga kotoa. Pea fatu ‘a e lao mo e tu’utu’uni ‘e he pule’anga ke tau’atāina ai ‘a e Tonga kotoa. ‘Oku ‘ikai ko e tau’atāina faka-e-tangata na’e tekaki ai ‘e Tupou I ‘a e fonua, ka ko e “Tau’atāina Faka-‘Otua” ‘oku ne hanga ‘o fakangatangata ‘a e lahi ‘o e tau’atāina ‘oku fakamatala ki ai ‘a e ngaahi ‘Efika pe Filosofia kehekehe ‘o e tau’atāina ‘i māmani. Ko e tau’atāina Faka-‘Otua, ko e tau’atāina ‘oku pule’i pea fakangatangata ‘e he ‘Otua ‘o fakatatau ki he taumu’a na’a Ne fakatupu ai kitautolu.

Na’e hā mahino ‘a e tu’unga ‘o e Tau’atāina Faka-‘Otua ko eni na’e foaki, ‘i he tō folofola ‘a e Ta’ahine Kuini ‘ofeina ‘o Tonga, Kuini Sālote Tupou III, ‘i he ‘aho ‘o e Senituli ‘o e Tau’atāina ‘i he 1962, ‘i Pangai, Ha’apai, ‘o ne folofola ai,“Ko e Tau’atāina ko e ME’A’OFA ‘a e ‘Otua, pea ko homau (Ha’a Tu’i) fatongia ko hono fakahoko pe ki he kakai ‘o e fonua.”

Ko e fakalaka lahi eni kuo hoko ‘i Tonga, he na’e mahino pē ‘i he te’eki ke foaki ‘a e Tau’atāina Faka-‘Otua ko eni ‘e Tupou I, na’e fu’u lahi ange ‘a e fakangatangata ki ha’a fafine mo e fānau pea na’a nau nofo mo’ulaloa mo fakaongoongo ki ha’a tangata. Ka neongo ia na’e ‘i ai pe ‘a e tu’unga ‘o e fefine ‘i he nofo faka-Tonga. Ka ‘i hono tali ‘e Siaosi Tupou I ‘a e lotu faka-Kalisitiane, pea mo e maama faka-‘Otua, pea lave ai ‘a Tonga ‘i he Tau’atāina Faka-‘Otua, ‘o hoko ko ‘etau koloa, pea toe fakafālahi ange mo toe hiki hake ‘a e tu’unga ‘o fafine mo e fānau ‘o fakatatau ki he fakahinohino ‘a e Folofola ‘a e ‘Otua mo e tui faka-Kalisitiane.

‘Oku mahino ta’etoeveiveiua ‘a e tu’unga ‘o e fāmili, pea ka lau ki he fonua fakalukufua, ‘oku hoko ‘a e Hau ‘o Tonga ko e ‘Ulu ‘o e Fāmili ‘o e Tonga. Pea ‘oku fakanofonofo ai pe ‘a kitautolu ‘o fakatatau ki hotau ngaahi fatongia, ka ‘oku kei hiliō ‘a e “Tau’atāina Faka-‘Otua” ‘oku ne fakama’uma’uluta ‘a e nofo ‘a fāmili. He ko e fāmili ‘o e Tonga, ‘oku ‘i ai ‘a e tamai, pea ‘oku ‘i ai ‘a e fa’ē pea mo e fānau. Pea ‘oku fakangatangata ai ‘etau tau’atāina ‘o fakatatau ki he ‘Imisi ‘o e ‘Otua na’e ngaohi kitautolu ki ai ‘e he Fakatupu, pea mo e Tau’atāina Faka-‘Otua kuo fai ‘aki hotau fakakoloa. Pea ‘oku kei polepole ai ‘a e Tonga ‘i he faivaola ‘a ha’a tangata ‘i tōkanga mo ngātai, pea vikiviki ai ‘i he nima mea’a ‘o ha’a fafine ‘i falehanga, kae’uma’a ‘a e lavame’a ‘a e fānau ‘i he ako mo e sipoti.

Ko e makatu’unga ia ‘oku taukave ki ai ‘a e ‘Apositolo ko Paula ‘i he Folofola ke hoko ‘a e tamai ‘o e fāmili ko e fatongia fakasevāniti pea ke lahi ange hono mafai ke ‘OFA ki he hoa pe uaifi mo e fāmili. ‘Oku fokotu’utu’u ‘e Paula ‘a e fāmili ‘o kamata mei he ‘ulu, pea ko e mafai ia ‘oku lahi ai hono fatongia ke ngāue fakasevāniti ki he toenga ‘o e fāmili. Ko ha’a fafine ‘i he lotofale ‘o e fāmili ‘oku ‘i ai pe honau fatongia ‘o fakatatau ki he ivi mo e mafai faka-‘Otua kuo fakakoloa’aki ‘e he ‘Otua.

Na’e lalanga pehē ‘a hotau tukufakaholo, ‘o fakatatau ki he fa’unga ‘o hotau fakatau’atāina ‘e he ‘Otua Mafimafi, fakafou mai ‘e he ‘Otu Laine Toputapu ‘o Ha’a Moheofo mo e Konisitūtone. Pea ‘oku kei ma’uma’uluta ‘a e fa’unga ‘o Tonga ko e kei tauhi ‘a hono tukufakaholo.

Ko e taha eni ‘o e ngaahi makatu’unga ‘oku  ‘IKAI ke poupou ai ‘a e kau Taki Lotu ‘o e Fonua ki he Talite ko eni, he ‘oku mahino ‘oku ‘ikai ko ha Talite lelei eni ki Tonga. Ko hono taumu’a ke tu’unga tatau ‘a e tangata mo e fefine. Pea ‘oku tui ‘a e kau Taki Lotu ‘oku kalokalo mamahi ‘a e Talite ni ki he lotu faka-Kalisitiane ‘oku tau pukepuke ko hotau mo’ui ‘anga, pea ‘oku ‘ikai ko e fa’unga eni ‘o e nofo ‘a Fāmili ‘i Tonga, pea pehē foki ki he tukufakaholo ‘oku nofo ‘aki ‘e he Tonga.

‘Oku mahino lelei pe ‘a hono ‘oange ‘a e faingamālie tatau kia hou’eiki tangata mo fafine, ka ‘e makatu’unga ‘i he mafai lava me’a kuo fakakoloa ‘aki kitautolu ‘e he ‘Otua, pea ko e konga ia ‘o hono faka’apa’apa’i ‘o ha’a fafine, ‘o taau mo e lotu faka-Kalisitiane. Ko e feinga ki he tu’unga tatau ‘o fakalao’i ‘e mole ai ‘a e ngeia lahi mo e faka’apa’apa’i ‘o ha’a fafine ‘o hangē ko ia kuo hoko ‘i he ngaahi fonua ‘o e Uesite. ‘Ikai ngata ai, ka ‘e toe lahi ange ‘a e maumau ‘o e nofo fakafāmili pea uesia ‘a e melino mo e ma’uma’uluta.

‘Oku mahino kiate kimautolu kau Taki Lotu ‘e ‘ikai lava ke ta’ofi faka’aufuli ‘a e pausi’i ‘o ha’a fafine mo e fānau he ‘oku tau kei ‘i māmani.  Ko e ‘ulungaanga fakasōtoma ‘e hoko pe ia, ka ko e ‘ikai ke tau tali, ‘e ‘i ai ‘a e faka’ehi’ehi mei ai.  Ko ia ‘oku lelei ‘a e fakangatangata ‘oku fokotu’u ‘e he Pule’anga ke ‘ai, ka ko e ava ‘a e matapā ‘i he CEDAW ‘e faingata’a hono ta’ofi pea ‘e ‘ikai tuku ‘a e teke ke faka’atā kotoa.

‘Oku mahino pe ‘i he Talite ni, neongo kuo tau fakahū atu mo e ngaahi kupu mavahe ‘oku lau ‘oku ‘ikai ke tau tali (reservation) ‘o hangē ko e Kupu 2, 10(h), 12(1), 14(2)(a), mo e 16, ka ko hono taumu’a ‘o e Talite ko eni ke tali kotoa. Pea kuo ‘i ai ‘a e fakamahino mai kuo pau ke ‘a’ahi fakata’u fā ‘a Tonga mo ‘ekea pe ko e hā ‘a e ngāue kuo tau fakahoko ki he ngaahi kupu ko eni kuo tau tuku mavahe ‘o ‘ai ai e fakangatangata.

‘Oku tui ai ‘a e kau Taki Lotu, ko ‘etau tali ‘a e Talite ko eni, ko e matapā ia ke tali kotoa mo e ngaahi Kupu kuo tau tuku mavahe, pea ko e toki tu’unga fakaloloma lahi eni ki he fonua pea kovi ange ko hono pa’usi’i ai ‘a e lotu faka-Kalisitiane mo e ‘Otua Mafimafi na’a Ne foaki mai ‘a e Tau’atāina Faka-‘Otua ma’a Tonga.

Ko e Talite ko ‘eni mo e Ngaahi Pule’anga Fakatahataha (UN) ‘oku kau ki ai mo e ‘u fonua kotoa kuo nau fakamo’oni ki he CEDAW.  ‘E malava ke nau ‘ekea mai ‘etau me’a ‘i Tonga ni fekau’aki mo e CEDAW he ‘oku faka’atā ia ‘e he Talite pea ‘oku ‘i ai ‘a e hoha’a lahi ki he matapā ko ‘eni ke fai tu’utu’uni mai ai ‘a e UN mo e Fakamaau’anga Fakavaha’apule’anga ki Tonga. ‘Oku fakahā ‘e he Pule’anga ‘e ‘ikai ke hoko ‘eni ka ‘oku hoko ia ‘i Nu’usila mo ‘Aositelelia ‘i he ta’efiemālie ki he tu’utu’uni ‘a e ngaahi fakamaau’anga ‘o e fonua pea tangi ki he Fakamaau’anga Fakavaha’apule’anga. Ko ‘etau fakaafe’i mai ‘etautolu ke lahi ange ‘a e faingata’a pea ‘e lahi ange ai ‘a e fiema’u ke fa’u e ngaahi lao pea mo e ngaahi fakamole ki hono fua ‘a e ngaahi nunu’a ‘e ha’u.

‘Oku kei ta’imālie ‘a Tonga ‘i he Langi Mama’o ‘a Siaosi Tupou I ‘i he ‘ikai ke falala ki he ngaahi fonua hau mo to’a, pea ‘oku ‘ikai ha ‘uhinga lelei ke tau hiki ai he ngaahi ‘aho ni. Ko e tuku ‘o Tonga ki he ‘Otua Mafimafi ke Ne malu’i hotau fonua ni ko e uho ia mo e moto hotau fonua, ‘a e ‘Otua mo Tonga, ko ia hotau Tofi’a.

Ko ia ‘oku mau fakahā ai ko e kau Taki Lotu ‘o Tonga, ‘a e ‘ikai ke mau tali pe poupou ki he Talite ko eni, he ‘oku fehangahangai ia mo e lotu faka-Kalisitiane ‘a e Tonga, pehē ki he nofo ‘a e fāmili Kalisitiane, pea mo e tukufakaholo ‘a e fonua lotu faka-Kalisitiane mo tui ‘Otua Mo’ui.

‘Oku mau fai eni ‘i he Loto Faka’apa’apa Mo’oni.


Mei he FAKATAHA’ANGA FAKAFONUA ‘A E KAU TAKI LOTU ‘O TONGA.
‘Aho 4 ‘o Me, 2015.

6 comments

  • Fifita
    Fifita Friday, 08 May 2015 15:10 Comment Link

    The big question that should be asked to the Prime Minister and his Cabinet is ," WHAT IS HIS SECRET AGENDA BEHIND THIS ISSUE ?"..With the little experience I have regarding this Prime Minister and his political maneuvers , there is always something regarding his moves...With the issues regarding CEDAW , Tonga has always put women's status high in the Tongan society ..compared to most countries...the Constitution protects everyone's rights even women and children..whatever CEDAW is offering we already have it in our Constitution ..so what is it that we don't have that CEDAW has ?..MONEY and SUPPORT to lean on when it comes to his next moves and my guess would be on the Land Issues..

    Report
  • Talamatangi
    Talamatangi Thursday, 07 May 2015 10:49 Comment Link

    'OKu ou fiekau atu he mafana he poupou ki he kau taki lotu he'enau nau kei ma'u ha maama faka'otua ke tataki 'aki hotau fonua . 'Oku totonu ke 'oua e ngalo ko e ongo 'OLive 'oku ua ko e Pule'anga mo e Siasi ka e malohi ha fonua. 'Oku tau tui ko e ko e Konisitutone 'o Tonga ne faka'ataa ia 'e he laumalie ki he Tama ko Tupou 'Uluaki ke ne ma'u 'a e maama mo mokoi hono finangalo ke tohi pea ke muimui kiai ha kakai kuo tuku ki Langi. Seuke ne mokoi e finangalo 'o La'a kuo unga fonua 'a Tupou fa ke toe to 'i Pouono ha fu'u 'ovava pea fakahuafa ia ko "Tauhi kiai". Me'a pango pe 'oku fu'u kei si'i 'a Vakata ia 'oku te'eki ke malava ia 'o Visone kiha kaha'u 'oku toe ma'uma'u lutaange. Kau taki lotu 'oku ou kau he lotu mo e fu'u kakai tokolahi 'o e fonua he lotu mo e hufia ke ma'u 'ehe Pule'anga ha maama ko e 'uhii ko e kaha'u 'o Tonga. Ko Lopeti Senituli foki ko e tama ia ne nofo muli pe ia he ngaahi ta'u lahi pea na'e talu 'ene tu'uta 'i Tonga mo 'ene poupou ki he ngaahi kaveinga ko 'eni. Neongo ne 'omi 'e Feleti ke fale'i ka na'e malava pe 'e Feleti ke 'ai pe ke mahino kia Lopeti ko e ki'i leka pe ia. Ka kuo fai holinga foki 'ene teke he taimini 'o makatu'unga ko e ki'i leka pe 'a Vakata pea kau kiai mo e feinga 'ata lelei 'a e Pule'anga ki he kakai fefine. Ka humai e CEDAW talamai 'eha taha 'e tuku ai hono fakamamahi'i e kakai fefine pea ta'ofi ai hono fakapopula'i 'ehe finematu'a si'i matu'a tangata. Ngali 'e mafuli heni 'inasi 'o e mehikitanga pea to'o ai mo e tauhi 'a e matu'a tangata ki honau fanga tuofafine. Tuku mu'a e holi faingofua mo e fie tuhu ki he 'umata ke kamata ke toitoi mai hono feinga'i ke lea tatau pe 'a e kakai mo e houeiki mo e Tu'i pea ko e ha leva hono fakamuimanoa ko e feinga ke to'o 'a e Tu'i. ('Oku mo'ui 'a e Tonga mei ivi mo e kelesi pe 'a e 'Otua)
    Malo

    Report
  • quo vadis
    quo vadis Thursday, 07 May 2015 08:28 Comment Link

    Eloquently stated!...malo 'ae kei hiki e ama takiloa!

    Report
  • S. Tataliatu
    S. Tataliatu Wednesday, 06 May 2015 16:17 Comment Link

    Kei Tonga pe 'a Tonga pea 'oku kei 'ofa pe 'a Sihova 'i Tonga. Fakamalo atu kau taki lotu fai mo'oni mo mateaki. Mo'oni lahi 'Aisake Tuiono koe me'a'ofa lelei 'eni ki he Tama Tu'i hono teke'i 'a Setane ke mama'o.
    'ofa atu

    Report
  • Aisake Tuiono
    Aisake Tuiono Wednesday, 06 May 2015 15:40 Comment Link

    Fakafeta'i 'a hoku laumalie kia Sihova He'ene kei fakahoko pe hono Finanangalo ki he Kau Taki Lotu Fakakalisitiane 'o Tonga 'i he Ta'u hilifaki Kalauni 'o e Tu'i 'o Tonga Tupou 6 (2015) ke 'oua 'e fakaava ha matapa 'o Setane 'i he fou mai he CEDAW ke monuka ngofua ai 'a e to'onga mo'ui 'o e TUI Fakakalisitiane.Na'e mo'oni pe folofola 'a Sisu ki he tevolo ke tu'u kimui pea tuku 'a 'a ene fieolopoto ke ne fakahoko ha'ane fekau 'a e tevolo 'oku fepaki ia mo e Finanagalo 'o 'etau TAMAI 'I HE LANGI. Fakamalo pea fakafeta'i he taulama taau, fakakalisitiane, fakapotopoto,fakahisitolia, 'ofa kakai tonga, 'ofa fonua pea laulotaha mo hotau Konisitutone mo hotau Tonga pea pehe ki he Visione mo e fakatokokanga 'a e La'a kuo nau ungafonua.'OKu ou fakahoko 'a e tohi ni mo e loto faka'apa'apa ki he Tonga Kotoa pe.

    Report
  • touiafutuna
    touiafutuna Wednesday, 06 May 2015 15:17 Comment Link

    Fakafeta'i e kei fakataulama 'oku fai 'e he kau takilotu ki he kakai 'a e 'Otua kuo nau fatongia 'aki hono tauhi pea 'oku mahino lelei 'a 'enau kei falala ki he tauhi 'oku fai mai 'e he 'Otua .vakai'i atu ange 'a e kapineti pe 'oku nau o ki ha lotu pe 'ikai, TONGA e ko e tau folau koa ki fee ?

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top