Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

‘Oku ‘ikai ha Potungāue ko e Potungāue Takimamata: Tuku aa e Takihala'i e Kakai Featured

‘Oku ‘ikai ha Potungāue ko e Potungāue Takimamata: Tuku aa e Takihala'i e Kakai

Nuku’alofa, 12 Sanuali 2015. Ko e kaveinga mahu’inga ‘eni ‘oku mahu’inga ke ‘ilo ki ai ‘a e kakai ‘o e fonua ‘a e mavahe ko’eni ‘a e Takimamata mei he Potungāue Fefakatau’aki, Takimamata mo e Ngaahi Ngāue ‘a e Kakai ‘i he konga ki mu’a ‘o e 2015.

Ko e fo’i mavahe ko’eni na’e makatu’unga ‘i he pole ‘a e Minisitā ki he Potungāue ‘o e Ngaahi Ngāue Lalahi ‘Etuate Lavulavu ki he Palēmia ke to’oange ‘a e Takimamata kiate ia tokua he ko hono mala’e mo hono mamana. Ko e pango foki he na’e fakahoko hono fakatekiteki ‘o e Minisitā ko’eni ‘aki ‘a e Takimamata ka e ‘ikai tomu’a fakahoko ‘a e me’a fakalao ia na’e totonu ke fakahoko.

‘Oku ‘ikai foki ke fo’ou ‘eni ia ki he founga ngāue ‘a e Pule’anga ‘o e ‘aho ni ‘a e tukufakatafa’aki ‘a e Lao kae lele fakapo’uli ‘a e ngāue. ‘I he taimi tatau ‘oku matu’utamaki ‘i he’ene a’u mai ki he ‘aho ni he ‘oku fepaki lahi ia mo e ngaahi tu’utu’uni kuo ‘osi fakahoko kimu’a ‘e he Palēmia.

‘Oku mahino mei heni ‘a e matavaivai hono fale’i ‘o e Palēmia he ‘oku toe kafo pe ‘i he funga ‘o ene ngaahi fai tu’utu’uni. Ko ‘ene tu’u foki he ‘aho ni ‘oku ‘ikai ha Potungāue ia ‘i he Pule’anga ko e Potungāue Takimamata he ‘oku te’eki fakalao’i ia pe ‘i ai ha Lao Fakaangaanga kuo fakahū ki he Fale Alea pea paasi ‘o Fakamo’oni Huafa kiai ‘a ‘Ene ‘Afio ke fakalao’i kuo hoko ‘a e Takimamata ‘o tu’u tau’atāina ‘iate ia ko e Potungāue makehe pea ‘i ai mo hano patiseti.

Ko e me’a ‘oku mahino ‘i he Lao lolotonga ko e Takimamata koe konga ia ‘o e Potungāue ki he Fefakatau’aki, Takimamata mo e Ngaahi Ngāue ‘a e Kakai (Ministry of Commerce, Tourism and Labour) pea ‘oku te’eki fakalao’i ke mavahe.

‘Oku malie he na’e tu’utu’uni foki ‘a e Palēmia ‘i he ‘aho 27 ‘o Novema 2015 ke to’o ‘a e Potungāue ‘o e Ngaahi Ngāue Lalahi meia ‘Etuate Lavulavu koe konga ia hono tautea hili hono faka’ilo faka-Fale Alea kae nofo taha pe ki he Potungāue Takimamata. ‘Oku fakaleleloto he ko e Potungāue Takimamata na’e tu’utu’uni ke nofo taha kiai ‘a e Minisitā ‘oku ‘ikai ke ‘i ai ha Potungaue pehe ia he Pule’anga Tonga.

Kuo ma’u foki mo e fakamatala falala’anga hange koia kuo ‘osi ‘oatu ‘e he Nepituno ki mu’a ‘oku ‘i ai ‘a e tu’utu’uni ke toe foki pe ‘a Lavulavu ki he Minisitā ki he Potungāue ‘o e Ngaahi Ngāue Lalahi he ‘oku fu’u ngalivale ‘a e tu’unga fakalao ‘o e tu’utu’uni ‘a e Palēmia.

Ko e lēsoni malie ‘oku ‘ohake ‘e he kaveinga ko’eni ‘a ia ‘oku ne hulu’i mai ‘a e tu’unga taukei mo e founga ‘oku fakalele ‘aki ‘a e Pule’anga. ‘Oku toe fehu’ia foki mo e tu’unga ‘oku fakahoko’aki hono fale’i ‘o e Palēmia. ‘Oku mahino foki na’e ‘ikai kumi fale’i ‘a e Palēmia ki e ‘Ateni Seniale hangē ko e anga maheni kimu’a pea fakahoko ‘a e ngaahi ‘aliaki ko’eni.
Kuo kamata foki ke ho’ata mai ‘a hono tukulalo’i ‘e he ngaahi fonua kaungā’api ‘o e Pasifiki ‘a e founga ‘oku fakalele ‘aki ‘a e fonua ‘a ia ko e me’a na’e ‘ikai ke angamaheni kiai ‘a Tonga talu mei tuai.

‘Oku mahino na'e tuku mai 'e he ongoongo 'a e Letio Tonga 'a e fakamatala kuo fakalao'i 'e he Kapineti 'a e Potungaue Takimamata 'i he 'aho Falaite kuo'osi 8 Sanuali 2016 . 'Oku fu'u fakaoli 'eni he 'oku te'eki ke tali 'e he Fale Alea ha Lao Fakaangaanga ke hoko 'eni 'o mo'oni he kuo pau ke paasi mei he Fale Alea pea fakamo'oni Huafa ki ai 'a e Tu'i.

Ko e me'a 'uluaki 'oku totonu ke mahino 'o fakatatau ki he founga ngaue 'a e Pule'anga kuopau ke 'uluaki paasi 'e he Kapineti 'a e fokotu'u ke fakahoko ha tu'utu'uni (Policy Direction) pea mei ai ki he 'Ateni Seniale ke fa'u 'a e lao ke fakalao'i 'a e nga'unu ko'eni ka e 'oua 'e 'uluaki lele ta'e fakalao kae muimui atu hono fakalao'i.

'Oku fu'u mahu'inga ke 'omai ma'u pe e hoosi (hufanga he fakatapu) ki mu'a kae saliote ki mui he 'oku sio mai 'a mamani.

4 comments

  • Ofakimuli
    Ofakimuli Thursday, 14 January 2016 10:43 Comment Link

    Kataki mu’a ‘Eiki Palemia, koeha ha’o lau?

    ‘Oku ‘iai koa ha Potungaue Takimamata? Na’ake mea’i ‘i ho’o hilifaki e tautea ‘o Hon. Lavulavu ‘oku ‘ikai ha Potungaue Takimamata, pe na’ake mea’i pe ia ‘e koe kake ‘ai ’ai noa’ia pe koe?

    Koe ‘uhinga ‘eku ngaahi fehu’i he ‘oku pehe ni. Kapau leva ‘oku ‘ikai ke ‘iai ha Potungaue Takimamata ta ‘oku ‘ikai koha Minisita ‘a Lavulavu ia pea ‘oku ‘ikai koha memipa ia ‘oe Kapineti. Kapau na’ake mea’i pe ‘e koe ‘oku ‘ikai ha Potungaue pehe ni he taimi na’ake hilifaki ai e tautea ‘o Lavulavu, ta ‘oku mahino mai ai na’a ke fakahoko ho’o tu’utu’uni ‘ihe ‘ilo ’ilo pau (deliberate intention) ke kei hoko pe ‘a Lavulavu koe memipa ‘oe Kapineti. Kapau leva na’ake mea’i pe ‘e koe kake ‘ai ’ai noa’ia pe, ta ‘oku mahino mai, ‘o ‘ikai toe veivei ua, ‘oku ‘ikai ke toe fe’unga keke hoko koe ko e Palemia ‘o Tonga. Toe ki’i vakai’i ange ‘Eiki Palemia na’a ‘oku lelei ange ke malu’i hifo ‘ae ki’i me’i toenga ngeia (dignity) ‘oku ke kei ma’u and seriously consider RESIGNING.

    Report
  • Tama Vavau
    Tama Vavau Wednesday, 13 January 2016 01:44 Comment Link

    Malie tama e fa'ahinga founga ia ko'eni 'oku ha'u moe temokalati ki Tonga. Malie Pule'anga 'o e Kakai.

    Report
  • Mark Hanson
    Mark Hanson Tuesday, 12 January 2016 15:44 Comment Link

    'E tuku 'afee e kaaimu'a moe fai tu'utu'uni hala 'ae PM? Pea na'e kamata 'anefe e fa'u lao 'ae Kapineti? Kuo tau lele fakaholomui, pea koe mo'oni lahi hono katakata'i mo manumanuki'i 'ehe ngaahi fonua kaunga'api hono fakalele e pule'anga Tonga hange ha ki'i faama kosi.. Old MacDonald ki ai !!! E I E I O ki ai !!!!!!

    Report
  • Moneata
    Moneata Tuesday, 12 January 2016 14:44 Comment Link

    Ko e Kapineti ia koena oku nau Tu'i pea Fakataha Tokoni, Fakamaau'anga toe Fale Alea. Ko e Kapineti naunau'ia eni ia pea ko e 'osi'osinga taha pe ena ia e kau poto Tonga High 'i loto. Kuo ha e matiketika ia? Kuo mou vaota kotoa pe kimoutolu. 'Oua toe tuku ha'o ivi Lavu hono kai honau 'uto he ko e taimi ni 'oku nau hiku kinautolu ka ke 'ulu koe ia.
    Nofo 'a 'Akilisi ia o fakatonutonu holo e kuohili ka e 'ikai nofo ia 'o tokanga'i e taimi ni.

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top