Tukuange 'a e Tu'unga Palemia he kuo fe'unga ^Featured

 7 Sanuali 2015

‘Eiki Palemia ‘o Tonga

‘Ofisi ‘o e Palemia Nuku’alofa

Re: Kole ke tukuange aa ho tu’unga ko e Palemia ‘o Tonga.

Tangata’eiki,

‘Oku ou faka’apa’apa mo kole ki he feitu’una ‘i he tokoni mai ‘a e ‘Otua mafimafi ke angalelei kae tukuange aa ‘a e tu’unga pe lakanga Palemia hotau fonua ka ko e pule’anga ‘o Tonga. ‘Oku makatu’unga ‘a e kole mo e tautapa ‘oku ou fai atu ki he feitu’una koe’uhi ko e tu’unga mo’ui lelei ‘oku ke ‘iai.

‘Oku ‘ikai ke puli ‘i he kakai ‘o e fonua ‘a e ngaue faimateaki li’oa mo fai’osikiavelenga ‘a e feitu’una ‘o ke a’usia ai ‘a e tokotaha memipa motu’a pea toe fuoloa taha ‘o e fale alea ‘o Tonga pea ke hoko ‘eni ko e Palemia ‘o Tonga ka koe’uhi ko e pelepelengesi ‘o e kaha’u hotau fonua mo e pule’anga kae pehe ki he lelei fakalukufua ‘a e kakai ‘o Tonga ko ia ai ‘oku fai atu ai ‘a e tautapa ki he feitu’una pea mo e kole fakamatoato ke angalelei aa mu’a ‘a e feitu’una kae tukuange aa e fatongia kiate kinautolu ‘oku nau kei ma’u ivi, ta’u si’i mo kei iiki ange koe’uhi ke nau hoko atu e fatongia ka ke ma’u aa ha malolo lelei mo fakatootoo la’a ki ‘api.

‘Oku fai ‘a e faka’apa’apa lahi ki he feitu’una koe’uhi ko e ta’u kuo ke a’usia pea ‘oku ou fakatauange ki he ‘Otua mafimafi ke ne kei hoko hoko lelei atu ‘a hono faitapuekina koe mo e fatongia ‘oku ke fuesia.

Faka’apa’apa atu.

Eliesa Fifita-Kolomotu’a.