"Ha'apai Mou Tu'u Fai Ha Ngāue" Featured
Palēmia 'O Tonga, Samuela 'Akilisi Pohiva
Nuku’alofa, 10 Sune 2015. Na’e me’a ‘a e Palēmia Samuela ‘Akilisi Pohiva lolotonga ‘a e feme’a’aki fekau’aki mo e Lao Fakaangaanga ki he Patiseti ‘a e fonua ‘i he Fale Alea ‘i he ‘aho ni Pulelulu 10 ‘o Sune ‘o famamafa’i ki he kakai ‘o Ha’apai kenau tu’u ki ‘olunga ‘o fai ha ngāue.
“Kole atu ki he kakai ‘o Ha’apai ke mou tu’u ‘o fai ha ngāue” koe konga ia ‘a e me’a ‘a e Palēmia. Ko e me’a foki ‘eni ‘a e Palēmia ‘o tali ki he fakamalanga ‘a e Fakafofonga Fika 13 ‘o e Vāhenga Ha’apai Veivosa Taka ‘o kole ke fakahoko leva ha ngāue ki he kakai masiva ‘o Ha’apai.
Na’e hā foki ‘i he fakamalanga ‘a Taka ‘a ‘ene fakamamafa’i kuo ‘osi fakahoko ‘a e liliu ‘uluaki ‘a ia ko hono fili ‘o e kau Fakafofonga ‘o e kakai, hoko atu ki hono fili ‘o e Palēmia pea koe liliu leva hono tolu ko hono tokoni’i ‘a e kakai masiva pea ke fakatokanga’i makehe ‘a Ha’apai he koe kakai masiva ange.
Na’e tali ki heni ‘a e Palēmia ‘o fakahā ‘oku fiema’u tokoni kātoa pe ‘a Tonga ni ‘o kau ki ai ‘a ‘Eua, Vava’u, Ongo Niua mo Tongatapu pea ‘oku totonu ke tu’u e kakai ‘o Ha’apai ‘o fai ha ngāue.
Na’e toe fakahā foki ‘e he Palēmia na’e talu e ‘osi ‘a e afā ko Ian mo e kei lahi pe ‘a e ngaahi feitu’u ‘i Ha’apai na’e ‘ikai fakama’a mo hiko ‘o a’u mai pe ki he ta’u ni pea na’a ne fekau ke fakakakato ‘eni. Na’a ne toe hoko atu ‘o fakahā ‘oku ‘ilonga ‘i he vahe Foa ‘a e lahi ‘a e vao ‘o mahino mai ‘oku ‘ikai fakahoko ha ngoue pea ‘oku fiema’u ke ngāue ‘a e kakai.
‘Oku ‘uhinga ‘a e Palēmia ‘i he’ene me’a ko’eni ‘i he Fale ki he lahi ‘a e kole mo e fakafalala ‘a e kainga mei he Fo’i’one’one ki he Pule’anga mo e ngaahi tokoni ka ‘oku fiema’u kenau tu’u mai kenau kaungā kau ‘i hono ‘alofi ‘o e vaka ka ‘oku ‘ikai koe tali vai pe ki langi.
![](http://pinterest.com/pin/create/button/?url=https://nepituno.to/index.php/parliament/item/393-ha-apai-mou-tu-u-fai-ha-ngaue&media=https://nepituno.to/media/k2/items/cache/15d406f06ce12f2ac57cb5137d1afc69_XL.jpg&description="Ha'apai Mou Tu'u Fai Ha Ngāue" "Pin It")
8 comments
-
Kou poupou ki he lau koena, oku totonu ke tuu a H P P Y o fai ha ngaue, mooni pe lau ia F.Lokotui ko H P P Y ia oku lahi e lea , pea oku mooni kuo ma e kau HP ia i Tonga he ngaue a e Fkfofonga, koe atunga e kuo kata mai a L.Helu hono ikai ke fili ia oku iai ene tuúnga fakaako pea oku iai pe eni fuu mooni ana ia, tau toe fakalelei ange foi tafaaki koia he fili hoko. F. Helu ki ai.
-
Veivosa Taka, fakafofonga 'o Ha'apai 13, maloo e fakahoko fatongia. 'Io, ko ho'o ha'u ki Falealea ke ke kole kole ki he hau fakafofonga ke 'oatu ha faingamalie ke tokoni'i 'a e kakai na'a nau fili mai koe. Ko e taha ia 'o e founga ngaue 'oku ngaue'aki 'ehe kau fakafofonga Falealea - ke nau kole ki he Falealea ha faingamalie tokoni. 'Oku totonu pe 'a e fakahoko fatongia ia 'oku ke fai. 'Oku mau pehee 'e kimautolu na'a ke lea kovi ki he hau 'o Tonga, pe 'oku ke angatu'u ki he pule'anga 'o Tonga... Vosa, 'eke atu angee ki he paleemia pe ko e fee 'a e $$$ na'a ne lau 'I he ngaahi ta'u koee kuo maliu atu 'oku ma'u 'ehee pule'anga ke faai 'aki 'a hono fakalelei'i 'o e vaahefonua Ha'apau, mo Tonga kotoa. Hangehangee, na'e 'ikai mo'oni e fu'u pa'anga ia ko ia, 'oku to e tenge ai e kau Ha'apai ke na u tu'u 'o ngaue. Vosa, na'e 'ilo'i pe ia 'e he kakai, 'oku 'ikai ha'o mata'itohi fakaako, ka na'a nau loto pe kinautolu ke ke huu 'o fakafofonga'i kinautolu. Ngalingali pe 'oku mau loto kovi he'emau ako lelei, ka e 'ikai ke mau lava he fili falealea. 'Ofa atu Veivosa.
-
Fo'i 'one'one mou ki'i fkmokomoko fkmolemole'i e fkfofonga oku iai fk'apa'apa lahi kiate ia tu'unga he fatongia pea koe loto moe fili kotoa ena ae kainga vahenga 13 ke hoko ko honau fkfofonga kihe falealea pea ikai ngata ai mou tuku hano ki'i faingamalie he ko si'ene toki huu ki office...... (hahaha).....pea tahataha si'ene uluaki fkotu'u i falealea pea tafuli'i ia he PM.....hhhh.....Palemia ngaue'aki e fk'atu'i si'i Vosa na oku tonu pe fkfofonga si'ene fokitu'u ka oku kai ke iai ha $$$$ koia ai fo'i one'one kakataki aileva koe ki'i ta'u pe 4.
-
Kesomi Fatanitavake ko e lea ia 'a e palemia ki Ha'apai pe ia he ko Foa pe mo Kauvai 'oku lahi taha ai e vao. 'Oku mahu'inga lahi ke a'uatu kia Veivosa ke tuku mu'a e kolekole mo e fakama 'i Nuku'alofa. Kuo matapunou e Ha'apai kotoa ho'omou hanga 'o ngaahi 'a Ha'apai ko e ngaahi motu 'o e kau vaipalo. Pea 'oku fu'ulahi 'ene 'oho ke hange 'oku poupou ki he me'a fakatemokalati ka ko 'ene poini 'oku totonu ke tipeiti ia mo ha kalasi 2 he lautohi pule'anga. 'Oku malie 'a e 'ai'ai mai 'a e kautama Vava'u pea fielau ko e kau ako kotoa kinautolu. Mo'oni pe lea 'o Ha'apai. Ha'apai sipela 'e topai, Ha'apai fili he topai. Ko Foa ko e motu 'o e kau poto pea 'iloa 'i Tonga he ngaahi mala'e kehekehe ka 'oku ki'i ngali fakaoli he ngaue 'a Veivosa. Taimi ke foki aa ia ki Foa 'o huo e vao 'oku lau kiai 'a e Palemia.
Malo -
Kuo vale ho tau kakai he lahi e ngaahi tokoni! Pea oku lave kotoa pe a Tonga he lea e tama palemia, ikai ko HP pe, fie mau a Tonga ke tau tuu kotoa ki olunga o fai ha ngaue
-
Poupou 100% ki hea a e Palemia oku fiemau ke piki nima o langa fktaha e fonua ka oku ikai koe faikava pe koe uhinga mahalo ia oku vaoa ai ng api uta koe ikai ke o fai ha ngaue pea oku lea hangatonu ki vahe Foa he koe feleoko ia o Hp ka kuo laka ange fanga kii motu kehe ia koe mea pe taha oku vaoa pe mo Vahe Kauvai pehe ki Pangai ofa atu kihe vahe Foa mou tuu o taimua he taki e ngaue malo.
-
Koe fakatonutonu ia ko 'eni na'e totonu ke kamata he ta'u 'e 25 kuo maliu atu ke fe'ao fakataha pe moe Demo he koe natulua totonu 'oe Demo, koe tui mo ngaue ka 'oku 'ikai koe pule'anga pe 'oe kakai pea mohe tali $
-
Kuo taimi ke nga'unu 'a Tonga ke fokotu'u ha fa'ahinga makatu'unga fakaako ke a'u kiai 'a e tokotaha fili Falealea. Kapau he'ikai ko e 'etau pahia he 'ai me'a noa'ia mo ta'e 'uhinga. Kuo tau fo'i he longoa'a noa 'a Veivosa fika 13 a Ha'apai. Pea kuo hangee ai 'a Ha'apai ha feitu'u ha kau polioo mo mamatea. Ko Ha'apai koe ngaahi motu 'o e kau to'a ka kuo hanga e Veivosa 'o 'ai 'a Ha'apai 'o hange ha finemotu'a kolekole 'i Nuku'alofa. Ko e fa'ahinga sipinga falealea 'a e ta'e ako. Kuo a'u atu mo Lavu 'o ngaahi mo Ha'apai 'o hangee kauleka lautohi Pule'anga. Mo'oni lahi e Palemia Ha'apai puna ki 'olunga 'o fai ha ngaue kae tuku e fo'ohake noa mo e mole taimi. Pea tuku a Veivosa e kolekole moe fakama. 'Oku fai ho'o vale ka 'oku lave ai 'a Ha'apai kotoa.
Malo