Fokotu’u ke ‘ave Palemia ki muli ‘o sivi faka-falemahaki Featured
5 ‘Okatopa, 2018. Na’e fokotu’u ‘e he Fakafofonga ‘Eua Tevita Lavemaau pea fepoupouaki mo e Fakafofonga Nopele ‘o Vava’u Lord Tu’ilakepa lolotonga ‘a e feme’a’aki ‘a e Fale Alea ke ‘ave ‘a e Palemia ki tu’apule’anga ‘o sivi faka-falemahaki.
Ko e konga foki ‘o e fokotu’u ko’eni ke hili hono sivi faka-falemahaki ‘o e Palemia pea lipooti mai hono ola ki he Fale Alea ‘o Tonga.
‘Oku mahino pe foki ‘a e tu’unga ‘o e mo’ui lelei ia ‘a e Palemia ‘oku ‘ikai ke ‘i ha tu’unga fakafiemalie pea ‘oku ta tu’olahi hono toutou ‘atimiti ki he Falemahaki Vaiola pehe ki hono toutou ‘ave faka-Fakemahaki ki Tu’apule’anga ‘i he ‘uhinga fakafaito’o.
‘I he taimi tatau ‘oku ‘ikai ‘ilo ‘a e fonua ki he tu’unga ‘oku ‘i ai ‘a e mo’ui ‘a e Palemia pea na’e toutou fakahoko hono fehu’ia ‘e he mitia pe mo e ‘ikai ‘omi ha tali mahino.
'Oku makatu'unga malohi pe foki ke 'ilo 'a e kakai 'o e fonua ki he tu'unga 'oku 'i ai 'a e mo'ui 'a e taki pea 'oku toutou fakafolau foki ki Tu'apule'anga 'o totongi mei he pa'anga tukuhau 'a e fonua.
‘Oku fifili foki ‘a e fonua ki he tu’unga ‘o e fokotu’u ko’eni he ‘oku lahi ‘a e ngaahi kaveinga ‘oku ‘ohake ‘i he feme'a'aki 'i he Fale Alea pea ‘oku fekau’aki mo e tu’unga fakataki mo e lahi 'a e ngaahi fehalaaki pea ‘e malava ke fakapipiki ki he 'uhinga 'o e fokotu’u ko’eni.
