Hoha’a Fakafofonga ‘Eua ki he ‘ikai tokoni’i ‘e he Pule’anga totongi ako Featured
Fakafofonga Kakai 'Eua Tevita Lavemaau
2 Sepitema, 2018. Na’e ‘ohake ‘e he Fakafofonga ‘Eua Tevita Lavemaau lolotonga ‘a e feme’a’aki ‘a e Fale Alea ‘o Tonga ‘aneafi Monite 1 ‘o ‘Okatopa ‘a e hoha’a ‘a e kainga ‘Eua ki he ‘ikai tokoni ange ‘a e Pule’anga ki he totongi ako ‘a e fanau ako ‘Eua.
Ko hono fakaha foki ‘eni ‘e he Fakafofonga ‘Eua he na’e ‘i ai ‘a e fakatamaki fakaenatula na’e tofanga ai ‘a e Vahefonua ‘Eua pehe ki Tongatapu ‘i he Saikolone ko Gita pea na’e fai ‘a e kole ki he Potungaue Ako ke tokoni mai ‘a e Pule’anga ki he totongi ako ‘a e fanau mo e ‘ikai pe.
Na’e toe hoha’a foki ‘a e Fakafofonga ki he tu’unga ‘o e ngaahi lokiako na’e maumau ‘i he Saikolone ko Gita ka ‘oku te’eki ke fakahoko ha monomono ‘e he Pule’anga neongo kuo lau miliona ‘a e ngaahi tokoni kuo ma’u ‘e he Pule’anga.
Na’e tali foki ki heni ‘a e Minisita Ako Penisimani Fifita pea na’a ne fakaha na’e ‘ikai ha fetu’utaki ange ‘a e kakai ia ‘o ‘Eua ‘o kole ha tokoni pea na’e loto lahi pe ‘a e kakai ia ke fua ‘a e ako ‘enau fanau.
Na’e faka’ikai’i mamafa foki ‘eni ‘e he Fakafofonga Nopele ‘o ‘Eua Lord Nuku ‘i he’ene me’a ‘o pehe ‘oku lahi e kakai ‘oku faingata’a’ia pea kuo nau ‘osi fakahoko mai honau faingata’a’ia kiate ia mo e Fakafofonga ‘o e Kakai ‘Eua Tevita Lavemaau ka ‘oku te’eki pe ha tokanga mai ia mei he Pule’anga.
Na’e fakamamafa foki ‘a e Fakafofonga ‘Eua ‘a e fiema’u ke fakahoko ‘e he Pule’anga hono fatongia totonu ki he kakai ‘o e fonua pea ke fakahoko he taimi totonu.
