Fakafuakava’i Palēmia mo e Kapineti pea ‘ikai ha Minisitā Ki Muli mo Malu’i Featured
'Eiki Sea 'o e Fale Alea Lord Fakafanua mo e Palēmia Samuela 'Akilisi Pohiva
18 Sanuali, 2018. Na'e lava lelei hono fakafuakava’i ‘o e Palēmia mo ‘ene Kapineti ‘i he 'aho 'aneafi Tua'pulelulu 18 'o Sanuali neongo na’e fai ‘a e laaulea fekau’aki mo e ‘ikai ha fakamatala mahino mei he Pule’anga.
Na’e lava pea ‘a e Palēmia ke me’a mai mei he Falemahaki Vaiola eongo 'ene tengetange pea ‘oku mahino pe foki na’e toe me’a pe kimu’a ‘oku te’eki ke tuku ‘a e Fale Alea ‘o foki ki he Falemahaki.
‘Oku mahino foki mei ngaahi fuakava na’e fakahoko he ‘aho ni ‘oku ‘ikai ha Minisitā ki he Malu’i mo e Potungāue Ki Muli ka koe fakamatala na’e tuku mai ki mu’a ange mei he Pule’anga ‘oku ‘i he malumalu ‘o e Palēmia ‘a e ongo Potungāue ko’eni.
Makehe mei he Palēmia na’e fakafuakava’i a e kau Minisitā ‘e toko 10 ‘a ia ko:
Semisi Lafu Kioa Sika, Tokoni Palēmia mo Minisitā Ki he Ngaahi Ngāue Lalahi & Takimamata
Lord Ma’afu, Minisitā Fonua
Penisimani ‘Epinisa Fifita, Minisitā Ako
Dr Saia Ma’u Piukala, Minisitā Mo’ui & Ngaahi Pisinisi ‘a e Pule’anga
Semisi Tauelangai Fakahau, Minisitā Ngoue
Sione Vuna Fa’otusia, Minisitā Lao
Poasi Mataele Tei, Minisitā MEIDECC
Mateni Tapueluelu, Minisitā Polisi & Tanaki Tukuhau
‘Akosita Havili Lavulavu, Minisitā Ngaahi Ngaue Fakalotofonua
Dr Tevita Tu‘i Uata, Minisitā Leipa
'Oku lolotonga folau faka-faito'o foki 'a e Minisitā Pa'anga Pohiva Tui'onetoa ia ki Tu'apule'anga.
Na’e toe fili pe ‘a Veivosa Taka ki he Sea ‘o e Komiti Kakato ‘aki ‘a e paloti kiai ‘a e toko 19-0 pea na’e hoko atu ai pe 'a e Fale ki hono fakapaasi 'a e tali ki he To Folofola 'a 'Ene 'Afio 'i hono huufi fakalotofale 'o e Fale Alea.
Na'e tu'ut'uni 'e he 'Eiki Sea ke me'a 'a Lord Vaha'i mo Losaline Ma'asi 'o fakahoko 'a hono tali 'o e To Folofola ki he 'Ofisi 'o e Palasi.
Na'e toloi ‘a e Fale Alea ki he Monite ‘aho 22 ‘o Sanuali.
