Toe hoko atu ‘a Samuela ‘Akilisi Pohiva ko e Palemia ‘o Tonga Featured
19 Tīsema, 2017. Na’e lava lelei atu ‘aneafi Mōnite 18 ‘o Tīsema ‘a e fili ‘e he kau Fakafofonga Fale Alea ‘o e fonua ki ha Palēmia fo’ou ma’a Tonga hange koia kuo tu’utu’uni ‘e he Konisitūtone.
Na’e toe ikuna ‘e Samuela ‘Akili Pohiva Fakafofonga Fale Alea 'o Tongatapu 1 ‘a e fili ko’eni kene hoko atu koe Palēmia ‘o e fonua ‘aki ha fili kiai ‘a toko 14 pea fili ‘a e toko 12 kia Siaosi Sovaleni Fakafofonga Fale Alea 'o Tongatapu 3 ‘a ia ko e kanititeiti ia na’a na fe’auhi.
‘Oku mahino ngofua pe foki koe toko 14 ‘o e kau Fakafofonga Fale Alea memipa ‘o e PTOA na’a nau fili kotoa kia Pohiva kae fili ‘a e kau Fakafofonga Nōpele ‘e toko 9 mo e toko 3 ‘o e kau Falafofonga tau’atāina ma’a Sovaleni.
‘Oku te’eki ke mahino hano fakanofo faka’ofisiale mei He’ene ‘Afio ‘a e Palēmia fo’ou ‘o hange koe anga maheni.
‘I he taimi tatau na’e hoko atu ai pe ki hono fili ‘o e Sea ‘o e Fale Alea pea na’e ikuna ia ‘e Lord Fakafanua 'one hoko koe Sea fo'ou 'o e Fale Alea pea fili 'a Lord Tu’ilakepa kene hoko koe Tokoni Sea fo'ou 'o e Fale Alea 'o Tonga.
‘E toki hoko tau leva ‘a e Palēmia fo’ou ki hono fili ‘a e kau memipa ki he’ene Kapineti.
