Lohiaki’i 'e he Palemia 'a e fonua: Ta na’e ‘ikai tautea ‘a Lavulavu ia Featured
Palemia 'o Tonga Samuela 'Akilisi Pohiva. 'Oku ha 'i loto he 'ata ko'eni 'a e taa 'o e Palemia mo Lavulavu ko konitulekitoa 'i he langa mala'e tapulu 'i Popua.
2 Aokosi, 2017. ‘Oku faka’ohovale ‘i hono tuku mai ‘i he feme’a’aki ‘a e Fale Alea ‘i he ‘aho ‘aneafi 1 ‘Aokosi 2017 ‘a me’a ‘a e Palemia ‘o pehe na’e ‘ikai pe ke ta’evahe ‘a Lavulavu ia.
Kapau pe ‘oku si’i toulekeleka pe Palemia kene manatu’i ‘ene tala tu’utu’uni ‘i he ‘aho 3 ‘o Tisema 2015 pea ‘oku totonu pe ke toe fakamanatu kiai.
Ko e tu’utu’uni ko’eni na’e fakamafola hangatonu mai ‘i he Letio Tonga pea na’e toe paaki tohi ‘o tufa ki he kau faiongoongo fekau'aki mo'ene kole ke tukuange kene tautea 'a Lavulavu ki he'ene vetehia 'i hono faka'ilo faka-Fale Alea ia ki hono mamau'i 'a e Lao fakatau (procurement) 'o hange ko hono lipooti 'e he 'Atita 'i he 2015.
Na'e toe me'a foki 'a e Palemia hili hono fakamafola 'ene tu'utu'uni 'oku 'ikai toe kehekehe 'ene tu'utu'uni mo e tu'utu'uni 'a e Fakamaau'anga pea 'oku 'ikai toe fu'u fiema'u ha fehu'i ia.
Ko e konga faka’osi ‘o e tu’utu’uni na’a ne hilifaki ai ‘a e tautea pea na’e anga pehe ni hono fakalea:
“Ko ia ai ko e tautea kuo hilifaki kia Lavulavu ‘i he’ene ta’e muimui ki he founga ngāue’ (procurement) ke ne ngāue ta’evahe ‘i he māhina ‘e 5 kamata ‘i Sanuali pea hiki mei he Potungāue Infrastructure ‘o nofo taha pē ki he Potungāue Takimamata’.
Fakatauange ‘e tokoni ‘a e Tu’utu’uni ni fekau’aki mo e Fokotu’u Faka’ilo faka- Fale Alea ‘o e ‘Eiki Minisitā, ‘Etuate Sungalu Lavulavu’ ki he kakai ‘o e fonua’.
Pea ke foaki mai ‘e he Ta’e Hāmai’ ‘ene kelesi’ ke tau ‘inasi kotoa ai fakataha mo ‘Ene ‘Afio’ mo e Fale ‘o Ha’a Moheofo’ ki he teu ‘o e ’aho alo’i hotau ‘Eiki Huhu’i’.
‘Ofa ke tau ma’u ha Kilisimasi fiefia mo ha Ta’u fo’ou mohu tāpuekina.”
Samuela ‘Akilisi Pohiva
‘Oku mahino mai ‘i he me’a ‘a e Palemia lolotonga ‘a e feme’a’aki ‘a e Fale Alea na’e ‘ikai pe kene tautea ta’evahe ‘a Lavulavu 'a ia 'oku mahino mei heni ko’ene fakamatala ki he fonua koe koto loi mo ta’e mo’oni.
Ko e tali foki 'eni 'a e Palemia ki he fehu'i 'a e Fakafofonga Nopele Fika 2 'o Vava'u Nopele Tu'ilakepa lolotonga 'a e feme'a'aki ki he Lipooti 'a e 'Atita pea 'oku faka'ohovale ki he tokolahi 'o e fonua.
‘Oku totonu ke kole fakamolemole ‘a e Palemia ki he fonua pea 'oku mahino mai foki 'oku ne toe fakapale'i 'a Lavulavu kene hoko koe pule ngaue (konitulekitoa) ki he langa mala'e tapulu mo paaka 'i Popua.
'Oku malava he taimi tatau ke faka'ilo faka-Fale Alea pe ko'ene fakafisi pe 'i he laumalie 'o e pule lelei 'a ia 'oku ne tu'uaki.
