Tali Fale Alea Nō Pa'anga 16.5 Miliona Pule'anga mei he Pangikē 'a Mamani Featured
Kuo tali lelei ‘e he Fale Alea ‘o Tonga ‘i he feme’aki ‘a e Fale ‘i he ho’ata Tu'apulelulu ‘aho 19 Ma’asi ‘a e Fokotu’u Tu’utu’uni na’e fakahū mai mei he Tepile ‘a e Pule’anga ke fakahoko ha noo mei he Pangikē (World Bank) ‘a Mamani makatu’unga ‘i he fiema’u ke tokateu ‘a e fonua ki mu’a pea toki hoko mai ha fakatamaki fakaenatula.
Na’e fakahā foki ‘eni ‘e he ‘Eiki Minisitā Pa’anga Dr. ‘Aisake Valu Eke ‘i hono fakama’ala’ala ‘o e Fokotuu Tu’utu’uni ko’eni pea ‘oku fe’unga mo e Pa’anga ‘e 16.5 Miliona ‘a ia kuo pau ke faka paasi ‘eni mei he Fale Alea he kuo ‘ova 'i he Pa’anga ‘e 15 Miliona ‘o fakatatau ki he Lao ‘o e Fonua.
Na’e hoko atu ‘a e ‘Eiki Minisitā ‘o fakahā ko e taumu’a ‘o e noo ko‘eni ke fakahoko ‘aki ‘a e ngaahi ngaue tokateu ki mu’a pea toki hoko mai ha fakatamaki fakaenatula ‘a ia ‘e kau kiai hono tokateu ‘o e ngaahi me’a tokoni, vai, ngaahi polokalama ako tokateu, fetu’utaki kau ai mo hano langa ha fale vakai matangi ‘i Tonga ni ‘o fakanaunau‘aki ‘a e ngaahi me’angaue fakamuimuitaha ki he vakai mo tala matangi.
Na’e toe fakahā foki ‘e he ‘Eiki Minisitā Pa’anga koe noo ko’eni ‘e tā fakafoki ia ‘i he ta’u ‘e 40 pea koe ‘uluaki ta’u ‘e 10 ‘e lele ia ‘i he piliote kelesi (grace period) ‘a ia ‘oku fiema’u ke totongi ‘e he Pule’anga ‘a e peseti pe ‘e 0.75% ‘o e totongi tupu pea toki totongi fakafoki leva ‘a e Pa’anga ‘e 16.5 Miliona ‘i he ta’u ‘e 30 ka hoko mai ai.
‘Oku lahi foki ‘a hono talanga’i ‘o e ngaahi nō ‘a e Pule’anga mo e Fonua kau ai ‘a e nō mei Siaina ka ‘oku hā mahino mai ‘i hono tali ‘e he Fale Alea ke toe fakahoko mo e nō ko’eni ‘a e kei fiema’u ke fakahoko ‘a e nō telia ‘a e fakalakalaka mo e lelei ‘a e fonua.
'E malava pe ke fakalea koe founga pe ia ‘e malava ai ke fakahoko ‘a e ngaahi ngaue mahu’inga pehe ni ma’a e fonua ‘o fakatatau ki hono ivi faka pa’anga.
