'E malava ke fakafoki mai e koloa 'a e Pule'anga: Hon. Poasi Tei Featured
Vao 'Akau Papa 'i he Fungafonua 'Eua
19 ‘Aokosi, 2016. Na’e fakahā ‘e he ‘Eiki Minisitā ki he Ngaahi Pisinisi ‘a e Pule’anga Hon. Poasi Tei ‘e malava ke toe fakafoki mai ‘a e koloa ‘a e Pule’anga (Tonga Forest Products Limited) kapau ‘e ‘ikai fai pau ‘a e Kautaha Maori ‘oku nau lisi ‘a e kautaha ki he aleapau na’e fakahoko.
Ko e fakahā ‘eni ‘e Tei lolotonga hono fakafehu’i ia ‘e Lord Nuku ‘i he Fale Alea ‘o Tonga lolotonga ‘a e feme’a’aki ‘i he ‘aho ‘aneafi. Na’e hoha’a foki ‘a Lord Nuku fekau’aki mo e mole ‘a e ngāue ‘a e kau ngāue he kautaha ni hili koia na’e palōmesi ‘a e Pule’anga he’ikai mole ha ngāue.
Fakatatau ki he me’a ‘a Lord Nuku kuo mole ‘a e ngāue ‘a e toko 13 pea koe monū’ia vāhenga pe ki he uike ‘e 2 na’e foaki ‘e he Kautaha ni ki si’i kau ngāue ko’eni.
Na’e fakahā foki ‘e he Fakafofonga Ha’apai 12 Vili Manuopangai ‘oku totonu ke fakamu’omu’a ma’u pe ‘e he Pule’anga ‘a e ngaahi Kautaha Tonga mo e kakai Tonga ‘i hono fakatau atu pe lisi ‘a e ngaahi koloa ‘a e Pule’anga.
Ko hono lisi ta’u ‘e 50 atu ko’eni ‘a e Kautaha Vaotā mo e ‘Akau Papa ‘a e Pule’anga (Tonga Forest Products Limited) ki he Kautaha Maori ko’eni na’e lahi e lau lea kiai ‘a e kakai ‘o e fonua pea na’e mo’ua foki ‘i he Fakamaau’anga Nu’usila ‘a e pule ‘o e Kautaha ni.
‘I he taimi tatau na’e tuku mai ha ongoongo tukuatu mei he Potungāue ki eh Ngaahi Pisinisi ‘a e Pule’anga ‘o fakahā ‘oku malu pe ‘a e aleapau ko’eni.
