Fili ‘a Penisimani Fifita ke Sea Komiti Kakato ‘a e Fale Alea Featured
Penisimani Fifita (Fakafofonga Fale Alea Tongatapu 9), Sea Komiti Kakato 'a e Fale Alea
Nuku’alofa, 8 Sune 2016. Kuo fili ‘a Penisimani Fifita ‘a ia ko e Fakafofonga Fale Alea ia ‘o Tongatapu 9 kene hoko ko e Sea ‘o e Komiti Kakato ‘a e Fale Alea ‘i he pongipongi ‘o e ‘aho ni.
Ko hono fili ‘eni ‘o Fifita kene fetongi ‘a Semisi Sika ‘a ia kuo fokotu’u ia ki he lakanga Minisitā ki he Ngaahi Ngāue Lalahi mo e Takimamata.
Na’e fili foki ‘a e lakanga ni mei ha fokotu’u ‘e ua ‘i he Fale ‘a ia ko Penisimani Fifita pea mo Vili Manuopangai Hingano ko e Fakafofonga ‘o Ha’apai 12. Na’e ikuna ‘e Fifita ‘a e pāloti ko’eni ‘aki ha fili kiai ‘a e toko 13 kae toko 9 kia Hingano.
Ko e fatongia mafatukituki foki ‘a e Sea ‘i he Komiti Kakato ‘a e Fale Alea he ko e konga lahi ‘o e feme’a’aki mo e tipeti ‘i he Fale ‘oku fakahoko ia ‘i he Komiti Kakato. Ko Fifita foki na’a ne fai fatongia he Potungāue Ako ‘a e Pule’anga he ta’u lahi kimu’a pea ne toki hoko koe Fakafofonga ma’a e Vahenga Fili Tongatapu 9.
