Tapuni Faka-Lotofale Faha'i Ta'u Faka-Fale Alea 2015-2016 Featured
Lord Vaea, Pilinisi Tu'ipelehake & Lord Vaha'i
Nuku'alofa, Fepueli 26 2016. Na'e tāpuni faka-lotofale 'a e Fale Alea 'o Tonga ki he faha'ita'u faka-Fale Alea 2015/2016 'i he 'aho 'aneafi 'aho Tu'apulelulu ko hono 25 'o Fepueli 2016. Ko hono tāpuni 'eni 'o e Fale Alea kae toki Huufi faka-'ofisiale 'i he 'aho 2 'o Sune 2016.
Ko e Hou'eiki Nōpele 'e toko 3 'a ia na'a nau fakahoko 'a e fatongia ni 'o hangē koe angamaheni 'a ia ko Lord Vaea, Lord Vaha'i mo Pilinisi Tu'ipelehake. Ko e Tama Pilinisi Tu'ipelehake na'a ne me'a 'o fakahoko 'a e Folofola mei he Taloni.
'Oku paaki atu ai pe foki heni 'a e Tō Folofola mei he Taloni.
‘Eiki Sea, ‘oku ou tuku ‘a e fakafeta’i ki he ‘Otua Mafimafi ‘o ke laumālie lelei pē, pea pehē ki he ‘Eiki Palēmia mo e Hou’eiki Minisitā ‘o e Kapineti, Hou’eiki Nōpelé pea mo e kau Fakafofonga ‘o e Kakai.
Kuo kakato ‘a e fakataha alea ‘o e ta’u ko ‘ení, ko ia ‘oku ‘oatu ‘a e fakamālō ‘Eiki Sea koe’uhī ko e ngaahi ngāue kotoa kuo fakahoko ‘i he lolotonga ‘o e ta’ú ‘a ia ‘oku ‘i ai ‘a e ‘amanaki ‘e tokoni ki he lelei fakalukufua mo e langa hake e fonuá.
‘Oku fakatokanga’i ‘a e ngaahi ngāue ko ia na’e fakahoko ke tokonia hotau kāinga Vava’u mo Ha’apai ‘i he ‘a’ahi mai ‘a e Saikolone ko Winston, koe’uhī ‘oku mahu’inga ke mateuteu pē ‘a e fonua ‘i he lolotonga e faha’i ta’u ko ení mo e ngaahi fakatamaki fakaenatula.
‘Oku ‘i ai ‘a e fakamālō ki he ngaahi pule’anga muli mo e ngaahi kautaha fakavaha’apule’anga koe’uhī ko e ngaahi tokoni na’e fakahoko mai ‘i he lolotonga e ta’u ki he langa fakalakalaka ‘o e fonuá mo e ‘amanaki ki he toe ngāue vāofi ange ki he kaha’u.
‘Eiki Sea, ‘oku ‘oatu ‘eku talamonū pea pehē ki he ‘Eiki Palēmiá mo e Kapinetí, Hou’eiki Nōpele mo e kau Fakafofonga ‘o e Kakaí.
‘Ofa ke faitāpuekina kimoutolu ‘e he ‘Eiki, ‘ofa atu.
