Kei fakalolongo Pasifiki ki hono fakaanga’i ‘e ‘Aositelēlia tokoni ‘a Siaina ^Featured

Na’e tuku mai foki ‘e he Pule’anga ‘Aositelēlia ‘o fakafou mai ‘i he’enau Minisitā ki he Pasifiki Concetta Fierravanti pea poupou kiai ‘a e ngaahi setisitika ‘o pehe tokua koe tokoni ‘a Siaina ‘oku ta’e’aonga pea 'ikai ke fakapotopoto.

‘Oku ‘uhinga ‘eni ki he ngaahi hala mo e ngaahi fale mo e ngaahi poloseki kehe pe pea ‘oku ne fakafihia’i tokua ‘a e ngaahi fonua ‘o e Pasifiki kenau tā mo’ua ki Siaina.

Na’e fakafepaki’i mamafa foki ‘eni ‘e he Pule’anga Siaina ‘i hono lipooti ‘e he ongoongo ABC ‘a ‘Aositelēlia ‘aki ‘enau fakahā mahino koe fakaanga ko’eni ‘a ‘Aositelēlia ‘oku ‘ikai ke mo’oni pea ‘oku nau feinga e nau pule’i pe ‘a e ngaahi fonua ‘o e Pasifiki pea kenau fakahoko ‘a e faka’amu ‘a ‘Aositelēlia he taimi kotoa.

Na’e toe poupou foki mo e Minisitā Ki Muli ‘a ‘Aositelēlia Julie Bishop ki he’enau Minisitā ki he Pasifiki ‘aki ‘ene pehē ‘oku fiema’u ke faka’ai’ai ‘i he Pasifiki ‘a e ngaahi polokalama ‘inivesimeni pea kene fakatupulekina ‘a e langa faka-‘ikonōmika pea ke mo’ui pe ‘a e ngaahi fonua ‘o e Pasifiki ‘iate kinautolu ka ‘oku ‘ikai ko hono faka’ai’ai kenau nofo popula mo e ngaahi mo’ua lalahi pea faingata’a ke totongi fakafoki.

‘Oku malie ‘eni he na’e fakahā ‘e he taki ia ‘o e fa’ahi fakaanga ‘a Fisi ka koe Palēmia malōlō ‘o Fisi ki he ongoongo a e Letiō ‘Aositelēlia ko Sitiveni Rabuka ‘oku hoko ‘a e hū mai ‘a Siaina koe fakakoloa he koe taimi pe ‘oku tāpuni mai ai ‘e he ngaahi hoa ngāue angamaheni mo tukufakaholo ‘o e ngaahi fonua ‘o e Pasifiki a e matapā hangē ko ‘Aositelēlia, kuo hū mai leva ‘a Siaina ia ke tokoni pea ‘oku hoko ‘eni he taimi lahi hangē koe taimi na’e hoko ai ‘a e ngaahi liukava ‘i Fisi.

'I he tu'unga 'o e tokoni 'a Siaina ki Tonga ni 'oku mahino  'oku lahi ange 'a e tokoni (grant) 'i he nō mo e mo'ua 'o e fonua ki Siaina.

Kaikehe 'oku kei hokohoko atu pe 'a e fakafetongi 'uhinga 'a e ongo fonua ni fekau'aki mo e kaveinga ni .