Faingofua ke hoko Vela Vao Lahi e La’ala’ā ^Featured

Ko e vela ko’eni na’e mahino mai na’e vave ‘ene kapui ‘a e ‘api tukuhau ni makatu’unga ‘i he fu’u momoa ‘a e saafa pehe ki he veve ‘i he ‘api ni. Na'e a'utonu foki 'a e ongoongo ni 'o vakai tonu ki he vela ni ka koe malie ne 'ikai ha mo'ui 'e mole pe koha lavea.

‘Oku lolotonga fetaulaki tu’u foki ‘a e fonua moha la’ala’ā lahi pehe ki he ‘afu toho ‘a e ‘ea pea ‘oku tu’u lavea ngofua leva ‘a e ngaahi ‘api ‘uta ki he vela vao. ‘Oku lolotonga fakahoko pe ‘a e ngāue ‘a e Potungāue Tamate Afi ki he tupu’anga ‘o e vela ko’eni pehe ki ha fakamahu’inga ‘oha maumau ka ‘oku hā mahino mai pe ko e ‘api ko’eni 'oku hange koha tu'unga 'ā pulu pea na’e ‘ikai fēfē ha ngoue 'e 'asi he 'elia ni ‘o makatu’unga ai hono kapui vave ‘e he vela.

Ko e vela ‘eni na’e hoko fakafuofua ki he taimi 2:30 efiafi pea na’e a’u tonu hake foki kiai ‘a e Kau Ngāue Tamate Afi pehe ki he ngaahi loli Tamate Afi ‘o fakahoko ‘enau ngāue ke fakangata ‘a e vela ko’eni pea na’e malava lelei foki ke fakangata ‘eni he na’e fehangahangai tonu ‘eni mo e Pausa Luna’eva. Na’e toe mei hoko ha fakatu’utamaki ‘o lahi kapau na’e a’u atu ‘a e vela ko'eni ki he Pausa.