Fuofua Faka’ali’ali ‘a e Kautaha Ngāue Fakamea’a True Tonga Inc. ^Featured

 Ko e kautaha fo’ou foki ‘eni na’e toki lesisita ‘i Tonga ni ‘i he konga ki mui ‘o e 2015 pea ‘oku nau taumu’a’aki hono fakamamafa’i, fakamahu’inga’i mo teke ‘a e mahu’inga ‘o e ngaue fakamea’a ‘i he fonua.

Haikomisiona 'Aositeleia, Monalisa Palu, Lesieli Tupou mo Veuveuso

Na’e fakaafe fakalangilangi ‘i he polokalama faka’ali’ali ko’eni ‘a e Ta’ahine Pilinisesi Kalauni Sinaitakala Tuku’aho mo e kau faakaafe tokolahi ‘a ia na’e kau mai kiai ‘a e Haikomisiona ‘Aositeleia H.E Brett Adams pehe ki he ‘Amipasitoa Siapani H.E Yukio Numata mo e kau ngāue faka-Pule’anga, kau fakafofonga mei he Sekitoa Taautaha, kainga muli pehē ki he kau ngāue fakamea’a tokolahi.

‘I he polokalama ni na’e malava ai ke tu’uaki atu mo fakatau ‘a e ngāue ‘a e kau ngāue fakamea’a pea na’e toe lava mo hono matā ‘e he kau fakaafe ‘a e ngāue ‘a e kau ngāue fakamea’a ‘a ia na’e faka’ali’ali ‘i he polokalama pea ‘oku ‘i ai ‘a e ni’ihi ‘o kinautolu kuo ‘iloa ‘enau ngāue ‘i Tonga ni pea kuo kamata ke fakamaketi’i atu ’enau ngaahi ngāue ‘i Tu’apule’anga.

Na’e fakamatala ‘a e Talēkita Pule ‘o e Kautaha ni Monalisa Palu ‘oku fakataumu’a ‘a e kautaha ni ke pātoloaki ‘a e tukufakaholo hange koia ‘oku hā he nimamea’a (Cultural Preservation), hakeaki’i ‘a e ‘ikonomika (economic empowerment), pea hoko koe ma’u’anga mo’ui ‘oku tu’uloa (Sustainable Levilihood). Na’e hoko atu ‘a Monalisa ‘o pehe koe ngaue ko’eni ‘a e kautaha mo hono kau memipa ‘oku mahu’inga kiate kinautolu ‘a e “loto” he ko’ene lelei koe ngaholo ia ‘enau ngaue.

‘Oku fe’unga mo e toko teau tupu ‘oku nau memipa ‘i he kautaha fo’ou ni pea ‘oku hā mahino mai mei he polokalama ko’eni na’e fakahoko ‘a e poupoua ‘a e ngaue fakamea’a kae pehe ki he lelei ‘a e kualiti ‘a e ngaahi ngāue na’e faka’ali’ali ‘i he polokalama ko’eni. “Ko e taha ‘eni ha polokalama lelei mo’oni pea ‘oku ne faka’ai’ai ‘a e taleniti ‘o e kakai Tonga tukukehe ange ‘ene lelei faka-‘ikonomika kiate kinautolu”, ko e fakamatala ia ‘a Lepuhā (Uili Lousī) ‘a ia koe taha ‘o e kau ‘Atisi ‘iloa ‘a Tonga ni ‘a ia na’e kau atu ki he polokalama ni.

‘Oku hoko foki ‘a e ngāue fakamea’a koe ma’u’anga mo’ui ia ‘a e kakai tokolahi ‘i he fonua ni pea ko hono lelei mo hono mahu’inga ‘oku ‘ikai ke toe veiveiua. Kaikehe, ‘oku hoko ‘a hono fokotu’u ‘o e kautaha ni koe fakakoloa ki hono teke ‘a e ngāue fakamea’a ‘i he fonua ni ‘o hange ko e lau ‘a ‘Atunaisa Kali ‘a ia ko e memipa ‘o e kautaha ni.

Ko e polokalama fakafiefia ‘eni pea ‘oku mahino mai mei he kau memipa ‘a ‘enau loto’aki ‘enau ngaue pea ‘oku malava ke ho’ata mei ai ‘a e laumalie ‘o e ‘amanaki lelei.